Azərbaycan Milli İncəsənət Muzeyində Azərbaycan xalqının Ümummilli Lideri Heydər Əliyevin anadan olmasının 100 illiyinə və Türkiyə Cümhuriyyətinin yaranmasının 100 illiyinə həsr olunmuş Türkiyənin SAKÜDER Beynəlxalq İncəsənət və sənət ustaları Birliyinin “Türkiyə- Azərbaycan qardaşlığı: Anadoludan əsintilər” adlı sərgisi açılıb.

Öz ölkələrinin tarixində silinməz iz qoymuş iki irimiqyaslı şəxsiyyət - müasir Azərbaycan dövlətçiliyinin banisi Heydər Əliyev və Türkiyə Cümhuriyyətinin qurucusu Mustafa Kamal Atatürk incəsənətin inkişafına töhfə verərək, hər zaman həm incəsənətə, həm də incəsənət ustalarına xüsusi qayğı ilə yanaşıblar.

“İki sahil” xəbər verir ki, sərgidə Ankara, İstanbul, İzmir, Antalyadan olan 19 rəssam, o cümlədən Asim Yucesoy, İnci Tekin, Bənövşə Ağayeva, Günəş Abbas və Mustafa Pişkin öz əsərlərini nümayiş etdiriblər. Sərgidə, həmçinin Azərbaycan ustaları – Xalq rəssamı Arif Hüseynovun və məşhur naqqaş Anar Hüseynovun əsərləri də təqdim olunub.

Qeyd etmək lazımdır ki, hər bir rəsm əsərini müşayiət edən etiketdə QR kodunun istifadəsi sayəsində ziyarətçilər müəlliflər haqqında ətraflı məlumat əldə edə bilirlər. Beləliklə, “Türkiyə-Azərbaycan qardaşlığı: Anadoludan əsintilər” sərgisi ekspozisiyanın bədii kanvasına müasir səs verməklə yanaşı, “SAKÜDER”in əsas məqsədlərindən biri - Atatürkün vəsiyyət etdiyi mədəni irsi gələcək nəsillərə ötürmək, rəssamlarla tanış etmək və sənətsevərlərin diqqətini onların əsərlərinə cəlb etmək məqsədini daşıyır.

SAKÜDER, birliyin incəsənəti və rəssamları dəstəkləməyə davam edəcəyini vurğulayıb.

“Türkiyə-Azərbaycan qardaşlığı: Anadoludan əsintilər” adlı sərgi oktyabrın 20-dək davam edəcək.