Füzuli rayonunun Horadiz qəsəbəsində Ümummilli Lider Heydər Əliyevin 100 illiyinə həsr olunmuş “El bilir ki, sən mənimsən” adlı konsert proqramı keçirilib.

“İki sahil” xəbər verir ki, tədbir Kürdəmir Regional Mədəniyyət İdarəsinin Füzuli rayon Horadiz şəhər Muğam Mərkəzində təşkil olunub.

Konsertdə Azərbaycan Dövlət Uşaq Filarmoniyası çıxış edib.

Konsert proqramında uşaq və yeniyetmələrin ifasında Vətən, Qarabağ mövzusunda, eləcə də Ulu Öndər Heydər Əliyevə sevgidən və məhəbbətdən yoğrulmuş mahnılar səsləndirilib, milli və dünya xalqlarının rəqsləri təqdim olunub.

Kürdəmir Regional Mədəniyyət İdarəsinin rəisi Faiq Xudanlı qarşıda duran vəzifələr barədə ətraflı çıxış edib.

Regional İdarənin rəhbərliyinin, rayon icra hakimiyyətinin, rayon ictimaiyyətinin nümayəndələrinin, mədəniyyət müəssisələrinin əməkdaşlarının iştirak etdiyi konsert proqramı anşlaqla qarşılanıb.

Konsertdən sonra Azərbaycan Dövlət Uşaq Filarmoniyasının müəllim və şagird kollektivi Horadiz şəhərinin görməli yerləri ilə tanış olub, Füzuli rayon Heydər Əliyev Mərkəzinə ekskursiya ediblər.