Azərbaycan  Respublikasının Prezidenti, Ali Baş Komandan  İlham Əliyev cənablarının rəhbərliyi ilə qəhrəman Azərbaycan Ordusu zəfər yürüşünü davam etdirir. Qarabağ uğrunda gedən müharibənin taleyini həll edən  Şuşa uğrunda döyüşlərdə  rəşadətli Ordumuz parlaq qələbə qazanmışdır. Bu qələbə  sadəcə müharibənin taleyini həll edən döyüş uğuru deyil. Bu qələbə həmdə Azərbaycan Xalqının qürurunu özünə qaytaran bir qələbədir. Bu qələbə müharibənin tam və qəti qələbə ilə yekunlaşdırmaq yolunda  həlledici dönüş nöqtəsidir. Əldə olunan bu parlaq qələbə münasibəti ilə Azərbaycan Respublikasının Prezidenti, Ali Baş Komandan  İlham Əliyev cənablarını təbrik edir, onun rəhbərliyi ilə torpaqlarımızın düşmən işğalından azad olunması uğrunda mübarizə aparan rəşadətli, qəhrəman Ordumuza yeni-yeni qələbələr arzu edirəm.

Bu fikirləri “İki sahil”ə açıqlamasında Milli Məclisin deputatı Rauf Əliyev söyləyib.

Rauf Əliyev bildirib ki, düşmən ən müasir silahlarla təchiz olunmuş qəhrəman Azərbaycan Ordusu qarşısında davam gətirə bilmir: “Azərbaycan Respublikasının Prezidenti, Ali Baş Komandan İlham Əliyev cənablarının müəyyənləşdirdiyi və həyata keçirdiyi  hərtərəfli düşünülmüş, balanslaşdırılmış, müdrik siyasət nəticəsində Azərbaycan bütün sahələrdə olduğu kimi ordu quruculuğu sahəsində də böyük uğurlar qazanmışdır. Azərbaycan Ordusu  dünyanın ən qabaqcıl 50 ordusu sırasındadır.”

Milli Məclisin deputatı onu da qeyd edib ki, Rəşadətli Ordumuz yüksək ruh yüksəkliyi ilə işğal altında olan  torpaqlarımızı azad etmək üçün qarşıya qoyulan vəzifələri yüksək peşəkarlıqla və qəhrəmanlıq nümunələri göstərməklə yerinə yetirirlər: “İnanırıq ki, qəhrəman Azərbaycan Ordusu Azərbaycan Respublikasının Prezidenti, Ali Baş Komandan İlham Əliyev cənablarının rəhbərliyi ilə tezliklə işğal altında olan bütün torpaqlarımızı işğaldan azad edəcək və Azərbaycan bayrağı Qarabağın işğaldan azad olunan bütün yaşayış məntəqələrində dalğalanacaq.  Bu şərəfli vəzifənin yerinə yetirilməsində qəhrəman Azərbaycan Ordusuna uğurlar arzu edirəm.”