Ötən ilin aprelində qoşunların təmas xəttində baş verən hadisələrlə  əlaqədar Təhlükəsizlik Şurasının iclasında vəziyyət  barədə açıqlama verən  Prezident,    Ali Baş Komandan İlham Əliyev  bildirdi ki, bundan sonra da düşmənin təxribatları cavabsız qalmayacaq: “Ermənistanın bu hərəkətlərinin də səbəbi mənim üçün sirr deyil. Mən dəfələrlə həm Azərbaycan ictimaiyyətinə, həm bu məsələ ilə bağlı olan vasitəçilərə, vasitəçilik edən ölkələrin başçılarına öz fikirlərimi bildirmişdim. Ermənistan sülh istəmir. Ermənistan işğal edilmiş torpaqlardan çəkilmək istəmir və bütün səyləri ona yönəldib ki, status-kvonu maksimum saxlaya bilsin...Bu iyirmi il ərzində həlledici məqamlarda Ermənistan həmişə təxribatlara əl atırdı. Təmas xəttində Ermənistan tərəfindən daim gərginlik yaradılır. Eyni zamanda, keçən əsrin sonlarında Ermənistan parlamentində terror aktının törədilməsi də məhz bu məqsədi güdürdü ki, münaqişə ilə bağlı mümkün olan razılaşmanı əngəlləsinlər və beləliklə, status-kvonu saxlaya bilsinlər.”

2014-cü ilin iyul-avqust aylarına təsadüf edən, Azərbaycan Ordusunun uğurlu hərbi əməliyyatları ilə yadda qalan erməni təxribatlarının Fransa Prezidenti Ollandın təşəbbüsü ilə  Parisdə Ermənistan və Azərbaycan prezidentlərinin görüşündən sonra baş verməsi,  göstərdi ki, qoşunların təmas xəttində təhlükəsizlik, etimad tədbirlərinin gücləndirilməsi barədə danışıqlar aktuallaşanda  Ermənistanın sabiq prezidenti Robert Koçaryandan miras qalan “qarın ağrısı” ənənəsi davam edir.   Məhz həmin görüşdən iki həftə keçməmiş Ermənistan işğal edilmiş  Azərbaycan torpaqlarında 47 min şəxsi heyətin iştirakı ilə hərbi təlimlər keçirdi.

Ötən ilin aprel ayında qoşunların təmas xəttində təxribatlar törətməyə cəhd edən Ermənistanın silahlı qüvvələri aldıqları zərbələrdən  nəticə çıxarmayaraq növbəti  dəfə  məkrli niyyətlərini  gerçəkləşdirməyə çalışdılar. Lakin düşmənin təxribatının qarşısını alaraq işğalçıya ağır zərbə vuran Azərbaycan Ordusunun  əsgər və zabitlərinin şücaəti nəticəsində xeyli ərazilərimiz işğaldan azad olundu,  bəzi strateji əhəmiyyətli yüksəkliklərdə Azərbaycan Ordusunun mövqeləri möhkəmləndi, bayrağımız Lələtəpədə dalğalandı.  Bir neçə gün davam edən döyüşlərdə 100-dən artıq  erməni məhv edildi, çoxlu sayda zirehli texnika, artilleriya qurğuları sıradan çıxarıldı. Ali Baş Komandan İlham Əliyev hadisələrə obyektiv qiymət verərək bildirdi ki, münaqişənin sülh yolu ilə  həllində maraqlı olan Azərbaycan  düşmənin həmlələrinin qarşısını almağa qadirdir: “Bizim heç bir günahımız yoxdur. Biz sadəcə olaraq bu təxribata cavab vermişik. Düz də etmişik. Bizə qarşı yenə təxribat törədilərsə onlar yenə də öz cəzalarını alacaqlar. Bu, bir. İkincisi, biz öz torpağımızda vuruşuruq. Biz Ermənistan torpağını işğal etməmişik. Biz öz torpağımızda vuruşuruq. Əgər erməni əsgəri ölmək istəmirsə, Azərbaycan torpağından rədd olsun.”

Bu günlərdə qoşunların təmas xəttində törədilən təxribatlar  analoji erməni  xəyanətlərin təkrarıdır. Yaranmış  vəziyyət göstərdi ki,  onu dəstəkləyən  dairələrin maraqlarına uyğun hərəkət edən Ermənistan  aldığı qulaqburmasından nəticə çıxarmır. Təmas xəttində bir neçə istiqamətdə  təxribatlar törədən  ermənilər növbəti dəfə  Azərbaycan Ordusunun qüdrətini  hiss etdilər. Yenə də  xeyli itki verərək məğlubiyyətə uğradılar. Atəşkəsi mütəmadi pozan Ermənistanın hadisələrə uyğun aqressiyalaşması, təxribatlar törətməsi  səbəbsiz deyil.  Azərbaycanın daxili və xarici siyasətinin dünya birliyi tərəfindən dəstəklənməsi Ermənistan  və onun havadarları tərəfindən qısqanclıqla qarşılanır. Sual oluna bilər: bu dəfə  işğalçını belə addım atmağa vadar edən səbəblər hansılardır?

Separatçı rejim olan “Dağlıq Qarabağ Respublikası”nın adının dəyişdirilməsi bəhanəsi ilə keçirilən qeyri-qanuni “referendumun” nəticələrinin  nüfuzlu beynəlxalq təşkilatlar, qüdrətli dövlətlər tərəfindən tanınmaması ölkəmizin dünya birliyində mövqeyinin möhkəmlənməsi və  siyasət müstəvisində   söz sahibi olması  forpost   Ermənistanın siyasi tənəzzülü idi.

Prezident İlham Əliyevin Belçikaya səfəri zamanı  Avropa İttifaqı  Şurasının prezidenti Donald Tusk və digər rəsmi şəxslərlə  görüşündə  sivilizasiyalararası dialoqlar üçün  sabit məkan kimi  maraq doğuran Azərbaycanla əməkdaşlıq, ölkəmizin qitə dövlətlərinin enerji təhlükəsizliyindəki rolu yüksək dəyərləndirildi.  Münxen Təhlükəsizlik  Konfransında  iştirak edərək hər bir ölkənin milli təhlükəsizliyi ilə eyni dərəcədə mühüm amil olan enerji təhlükəsizlinin əhəmiyyətini, Azərbaycanın şaxələndirilmiş enerji layihələrinin istehlakçı  ölkələrin iqtisadi inkişafına  verdiyi səmərəni diqqətə çatdıran, qarşılıqlı etimad və  əməkdaşlığın məntiqi nəticəsi adlandıran Prezident İlham Əliyevin çıxışı maraqla qarşılandı. Konfrans çərçivəsində təşkil olunan panellərdə  verilən sualları obyektiv, beynəlxalq hüquqa əsaslanan açıqlamaları ilə cavablandıran, Ermənistanın təcavüzkar siyasətini  regional sabitlik və  qlobal layihələr üçün  təhlükə hesab edən, işğalçı dövləti dəstəkləyənlərin hüquqazidd mövqelərini, ikili standartları qətiyyətlə  pisləyərək  belə yanaşmanı münaqişələrin həllinə mane olan neqativ hal adlandıran  cənab İlham Əliyev bir daha siyasi iradə və qətiyyət göstərdi.    

Bu günlərdə Bakıda  keçirilən, ABŞ-ın da dəstəklədiyi  “Cənub Qaz Dəhlizi” Məşvərət Şurası çərçivəsində  nazirlərin üçüncü toplantısında  layihədə iştirak edən dövlətlərin təmsilçiləri bildirdilər ki,    Azərbaycanın təşəbbüsü ilə  həyata keçirilən enerji layihələrinə alternativ ola bilməz. Təbii ki, Azərbaycanın  dünya birliyində artan nüfuzu   səmərəsiz, alternativ layihələri ilə  dünya enerji bazarında mövqe tutmağa çalışanların istəkləri ilə  üst-üstə düşmür. Belə ki, mənfur niyyətlərini birbaşa deyil,  dolayı  yolla, üçüncü tərəfdən yararlanmaqla həyata keçirməyə çalışanların məqsədi  çaşqınlıq yaratmaq, bölgədə nüfuz sahibi olmaq uğrunda mübarizədə  şans qazanmaqdır.  Belə  mürəkkəb, siyasi hadisələrin bolluğu şəraitində Ermənistan kimi oyuncaq dövlətdən istifadə gündəmə gətirilir. Aydındır ki, qoşunların təmas xəttində   bir neçə gün davam edən hərbi əməliyyatlar belə siyasi qısqanclığın nəticəsidir.

Ermənilərin 25 il bundan əvvəl həyata keçirdikləri Xocalı soyqırımının ildönümü günündə baş verən təxribat işğalçının mənfur niyyətindən xəbər verir. 1992-ci ildə işğalçılıq əməllərinə, dinc sakinlərə qarşı törətdikləri vəhşiliklərə haqq qazandıran, qətliamla bağlı   xarici  KİV-lərə müsahibəsində dinc əhalini öldürməyi “zarafat” adlandıran, soyqırımının  birbaşa iştirakçısı olduğunu yüksək tribunadan etiraf edən Ermənistanın ələbaxan prezidenti Serj Sarkisyanın “zarafatlarına” Azərbaycanın güclənən ordusu, qalib  əsgəri  adekvat cavab verir.

Mövqelərimizə  hücum edən düşmən yenə də  sarsıdıcı zərbə alaraq məğlubiyyətə uğradı. Dünya  ictimaiyyəti növbəti dəfə Azərbaycan  əsgərinin Vətənə bağlılığının, döyüş hazırlığının şahidi oldu. Bu da təbiidir. Azərbaycanda müasir silah və texnika istehsal olunur, eyni zamanda, xarici mənbələrdən alınan avadanlıq, texnika, silah-sursat ən müasir standartlara cavab verir.  Hava hücumuna qarşı ən müasir,  güclü artilleriya qurğuları vardır. Böyük dəqiqliyə və çox böyük dağıdıcı qüvvəyə malik raket sistemləri, döyüş və nəqliyyat helikopterləri, döyüş təyyarələri, zirehli texnika, tanklardan istifadə etməklə təmas xəttində gedən döyüşlərdə  üstünlük qazanan Azərbaycan hərbçiləri torpaq, Vətən uğrunda canından keçməyə hazır olduğunu təsdiqlədi.

Qələbə itkisiz olmur, müharibədə həlak olanların şücaəti mənsub olduğu xalqın  qəhrəmanlıq salnaməsinə  qanla yazılır, gələcək nəslə  Vətənə, torpağa bağlılıq duyğaları aşılayır. Cəbhənin  Xocavənd- Füzuli istiqamətində  əlverişli mövqeləri ələ keçirməyə  cəhd edən düşmənə  ağır zərbə vuran ordumuzun hərbi qulluqçuları - Abdullayev Aqşin İsmayıl oğlu,  Nəzərov Şahlar Yaşar oğlu,  Haşımlı Tural Əbdul oğlu, Qədimov Zülfü Rəhim oğlu və  Cəfərov  Zakir Nazim oğlu ölümləri ilə ölümsüzlüklərini əbədiləşdirdilər.

Bu günədək Dağlıq Qarabağ münaqişəsinin  sülh  yolu, Azərbaycanın ərazi bütövlüyü çərçivəsində həlli məqsədilə qəbul olunan bəyanat və qətnamələrə etinasızlıq göstərən Ermənistan namərdliyini bir daha göstərdi.  Ermənistan silahlı qüvvələrinin  cəbhə boyu törətdiyi irimiqyaslı əməliyyatların qarşısını alarkən həlak olan və cəsədləri  neytral ərazidə qalan Azərbaycan şəhidlərinin geri qaytarılmasında da  aqressiv davranışları ilə dünya ictimaiyyətinin qınağına  səbəb oldu. Şəhidlərin götürülməsi ilə bağlı  ATƏT və  Beynəlxalq Qızıl Xaç Komitəsi nümayəndələri arasındakı razılığa baxmayaraq əldə olunmuş şərtləri pozan Ermənistan  bu məsələdə də  qeyri-insani davranışlarını bir daha təsdiqlədi. Təəccüb doğuran isə  münaqişənin həllində  təcavüzkarla təcavüzə məruz qalana eyni münasibət göstərən beynəlxalq müşahidəçilərin, ATƏT təmsilçilərinin Azərbaycan torpaqlarının zəbt olumasından deyil, atəşkəsin pozulmasından narahat olmalarıdır. Həmsədrlərin münaqişəyə münasibəti elə təsəvvür  yaradır ki, guya Azərbaycan torpaqlarının işğalında Ermənistanın günahı yoxdur.

Amma zamanın sözünü həqiqətin dili ilə söyləyəcəyi gün yaxınlaşır. Hücum taktikasına üstünlük verən Prezident, Ali Baş Komandan İlham Əliyevin əmrini gözləyən Azərbaycan Ordusu  düşmənə son və qəti  həmləsini   vuracaq.  Qələbə sevincini yaşayacaq  Azərbaycan əsgəri, xalqımız bütün şəhidlərimizin ruhu qarşısında borcunu yerinə yetirəcək, onlara rəhmət diləyərək zəfər müjdəli  gur səslə deyəcək: Dünya bir gündür, o gün bu gündür. 

Xuraman İsmayılqızı, “İki sahil”