Tam Suverenlik Dövrünün İlk Partiya Forumu

2026-cı il oktyabrın 2-də Bakı şəhərində, Heydər Əliyev Mərkəzində Yeni Azərbaycan Partiyasının VIII Qurultayı keçirilmişdir. Bu tədbir Azərbaycanın müasir dövlətçilik tarixində xüsusi mərhələ təşkil edir, çünki ölkəmizin ərazi bütövlüyünün və tam suverenliyinin bərpasından sonra reallaşan ilk ümummilli partiya forumudur. Azərbaycan Respublikasının Prezidenti və Yeni Azərbaycan Partiyasının Sədri İlham Əliyev qurultaydakı proqram xarakterli nitqində Azərbaycanın keçdiyi tarixi zəfər yolunu təhlil etmiş, regional reallıqları qiymətləndirmiş və dövlətin gələcək inkişafının əsas prioritetlərini bəyan etmişdir.

Dövlət başçısının nitqi təkcə hakim partiyanın fəaliyyət proqramı deyil, həm də müasir dünyada baş verən geosiyasi dəyişikliklər fonunda Azərbaycanın milli təhlükəsizlik, xarici siyasət, ideoloji müdafiə və iqtisadi müstəqillik doktrinasını əks etdirir. Çıxışda Vətən müharibəsində və antiterror əməliyyatında əldə olunan tarixi nəticələr, xarici təzyiqlərə qarşı müqavimət, böyük güclərlə münasibətlərin qurulması və ideoloji təhlükəsizliyin təmin edilməsi kimi Aktual məsələlər ətraflı şəkildə işıqlandırılmışdır.

Zəfər Reallıqları, Suverenliyin Bərpası və Yeni Geosiyasi Status-Kvo

Prezident İlham Əliyev çıxışında 2020-ci il 44 günlük Vətən müharibəsinin və 2023-cü il 19-20 sentyabr tarixlərində keçirilmiş birgünlük lokal antiterror əməliyyatının tarixi əhəmiyyətinə xüsusi diqqət çəkmişdir. Dövlət başçısı bəyan etmişdir ki, 8 Noyabr Zəfər Günü ilə yanaşı, 20 Sentyabr tarixi də xalqımız üçün əbədi bayram və eyni dərəcədə böyük əhəmiyyət kəsb edən gündür. Çünki məhz 2023-cü il sentyabrın 20-də Azərbaycan torpaqlarında separatizmə, işğala yekun vurulmuş, ərazi bütövlüyü və suverenliyi tam bərpa edilmişdir.

Dövlət başçısı vurğulamışdır ki, Azərbaycan bu tarixi hərbi və siyasi zəfərləri asanlıqla əldə etməmişdir. Bu illər ərzində ölkəmiz böyük güclərin ciddi müqaviməti, Azərbaycana qarşı yönəlmiş yalan və iftira kampaniyaları ilə üz-üzə qalmışdır. Xüsusilə keçmiş ATƏT-in Minsk qrupunun həmsədri olan aparıcı dövlətlərin və onların arxasında duran dairələrin fəaliyyətinə toxunan Prezident bildirmişdir ki, Azərbaycan bu hərbi-siyasi qələbəni böyük dövlətlərin açıq və gizli təzyiqləri fonunda, öz gücü və milli iradəsi hesabına qazanmışdır. Bununla da dünya praktikasında yeni bir presedent yaranmışdır: suverenliyini qorumaq üçün xalqı və rəhbərliyi vahid mövqedə duran dövlət hər cür xarici diktəni neytrallaşdırmağa qadirdir.

İdeoloji Təhlükəsizlik, Təhsil və Vətənpərvərlik Çağırışları

Qurultay çıxışının ən vacib və strateji bölmələrindən biri ölkənin ideoloji təhlükəsizliyi məsələsinə həsr olunmuşdur. Prezident İlham Əliyev qeyd etmişdir ki, hazırda dünyada müharibə və münaqişə ocaqları genişlənir, Azərbaycanın yerləşdiyi region və ətraf məkanlar alovlanır. Belə bir şəraitdə fiziki təhlükəsizlik qədər ideoloji təhlükəsizliyin də qorunması həyati önəm daşıyır.

Meydanda və hərbi müstəvidə uduzan xarici dairələrin indi ideoloji təxribatlara, dezinformasiyalara və şayiələrə əl atdığını bildirən ölkə rəhbəri, ideoloji məkanın yad ünsürlərdən və kənar təsirlərdən tam təmizlənməsinin vacibliyini vurğulamışdır. Bu təxribatların qarşısının alınmasında Prezident iki əsas amili önə çəkmişdir:

Təhsil və Bilik: Xalqımız, xüsusən gənclərimiz nə qədər təhsilli, bilikli və savadlı olarsa, bir o qədər xaricdən yönəldilən yalanlara, şayiələrə və zəhərli ideoloji hücumlara uymayacaq, tənqidi təfəkkürü ilə doğrunu yalandan ayırmağı bacaracaqdır.

Vətənpərvərlik Ruhunun Gücləndirilməsi: Gənc nəslin öz dövlətinə, milli dəyərlərinə bağlı böyüməsi əsas şərtdir. Azərbaycan vətəndaşı öz tarixi, Zəfəri və müstəqil dövləti ilə fəxr etməli, düşmənlərin unudulmaması üçün tarixi yaddaşı həmişə oyaq saxlamalıdır.

 Müstəqil Xarici Siyasət: Ləyaqət, Prinsipiallıq və Qlobal Tərəfdaşlıq

Prezident İlham Əliyev xarici siyasət strategiyasının əsas prinsiplərini açıqlayaraq bildirmişdir ki, Azərbaycanın yürütdüyü siyasi xətt ilk növbədə ölkənin daxili işlərinə heç bir kənar qüvvənin müdaxilə etməməsi üzərində qurulub. Dövlət başçısı qətiyyətlə bəyan etmişdir: "Bizə heç kimin köməyi də lazım deyil, himayədarlığı da lazım deyil".

Azərbaycanın beynəlxalq aləmdə özünü ləyaqətli və etibarlı tərəfdaş kimi təsdiqlədiyini deyən Prezident vurğulamışdır ki, rəsmi Bakı heç vaxt ikibaşlı oyunlar oynamayıb, hansısa ölkəyə qarşı ikiüzlülük və riyakarlıq göstərməyib. Məhz bu səbəbdən "Azərbaycanın sözü imzası qədər dəyərlidir" prinsipi dünyada qəbul edilir.

Çıxışda son dövrlərdə xarici siyasət müstəvisində əldə olunan tarixi nailiyyətlərə de toxunulmuşdur. Xüsusilə dünyanın iki aparıcı güc mərkəzi — Çin Xalq Respublikası və Amerika Birləşmiş Ştatları ilə münasibətlərin strateji səviyyəyə qaldırılması vurğulanmışdır. Çinlə "Hərtərəfli Strateji Tərəfdaşlıq Bəyannaməsi"nin imzalanması və ABŞ ilə Strateji Xartiyanın qəbul edilməsi Azərbaycanın qlobal diplomatiyadakı balanslaşdırılmış və müstəqil mövqeyinin bariz göstəricisidir.

İqtisadi Müstəqillik və Böyük Qayıdışın Maliyyələşdirilməsi

Cənab İlham Əliyevin proqram nitqində toxunduğu digər fundamental məsələ iqtisadi suverenlikdir. Ölkə Prezidenti qeyd etmişdir ki, güclü, kənar təsirlərdən asılı olmayan iqtisadiyyat olmadan tam siyasi və hərbi müstəqilliyi saxlamaq mümkün deyildir.

Azərbaycanın iqtisadi göstəricilərinin sabitliyini qeyd edən dövlət başçısı bildirmişdir ki, ölkəmiz xarici yardımlardan asılı deyildir. Müharibədən sonra dağıdılmış ərazilərin — Qarabağ və Şərqi Zəngəzurun bərpası, infrastruktur layihələrinin həyata keçirilməsi və "Böyük Qayıdış" proqramının maliyyələşdirilməsi tamamilə Azərbaycanın daxili imkanları və öz büdcəsi hesabına həyata keçirilir. Bu amil Azərbaycanın iqtisadi cəhətdən nəinki regionda, qlobal miqyasda öz ayaqları üzərində möhkəm duran dövlət olduğunu sübut edir.

 Yeni Azərbaycan Partiyasının Önündə Duran Yeni Mərhələ və Vəzifələr

VIII Qurultay YAP-ın daxili təşkilati həyatında və gələcək fəaliyyətində də mühüm addımlarla yaddaqalmışdır. Qurultayda Təftiş Komissiyasının hesabatı dinlənilmiş, partiyanın Nizamnaməsinə lazımi dəyişikliklər olunmuş, İdarə Heyətinin (40 nəfər) və Təftiş Komissiyasının (13 nəfər) yeni tərkibi səsə qoyularaq yekdilliklə təsdiq edilmişdir.

Partiyanın Sədri cənab İlham Əliyev çıxışının sonunda YAP üzvlərinə və fəallarına müraciət edərək bildirmişdir ki, əldə olunmuş zəfərlər və tarixi uğurlar arxayınlaşmağa əsas vermir. Partiya üzvləri dövlətin qarşısında duran yeni strateji vəzifələrin icrasında, ideoloji mübarizədə və milli həmrəyliyin möhkəmləndirilməsində həmişə olduğu kimi ön sırada dayanmalı, fəallıq göstərməlidirlər.

Cənab Prezident İlham Əliyevin Yeni Azərbaycan Partiyasının VIII Qurultayındakı tarixi çıxışı Azərbaycan dövlətinin suverenlik, güclü ordusu, müstəqil xarici siyasəti və milli ləyaqət prinsiplərinə söykənən gələcək inkişaf yolunun dəqiq xəritəsidir. Dövlət başçısının səsləndirdiyi fikirlər göstərir ki, Azərbaycan yalnız keçmiş qələbələri ilə kifayətlənmir, dünyada baş verən mürəkkəb geostrateji dəyişikliklərə adekvat cavab verməyə və öz milli maraqlarını bütün platformalarda müdafiə etməyə tam hazırdır.

YAP-ın VIII Qurultayına qədər keçən Şərəfli yol dövlətçiliyin möhkəmlənməsi, iqtisadi inkişaf, ərazi bütövlüyünün və suverenliyin bərpası ilə yadda qalıb. Bu yol təsadüfi olmayıb. O, ümummilli lider Heydər Əliyevin siyasi kursuna sadiqlik, xalqa inam, dövlətçilik şüuru və Vətənə sədaqət üzərində qurulub. İndi qarşımızda əldə olunmuş nailiyyətləri qorumaq, Böyük Qayıdışı davam etdirmək, iqtisadiyyatı şaxələndirmək və sosial rifahı daha da yüksəltmək vəzifəsi dayanır. Əminik ki, Yeni Azərbaycan Partiyasının hər bir üzvü bu şərəfli vəzifənin yerinə yetirilməsində bundan sonrada fəal iştirak edəcək.

Xıdır İbrahimov,

SOCAR “Nefqazelmitədqiqatlayihə” İnstitutunun şöbə rəisi, texnika üzrə fəlsəfə doktoru, dosent