Qazaxıstanın tərəfdaş ölkələri Hörmüz boğazındakı məhdudiyyətlər səbəbindən respublikadan neft tədarükünü mümkün olan ən yüksək səviyyəyə çatdırmağı xahiş edirlər.

“İki sahil” TASS-a istinadla xəbər verir ki, bu barədə jurnalistlərə Qazaxıstanın energetika naziri Yerlan Akkenjenov məlumat verib.

Nazirin sözlərinə görə, Qazaxıstan hazırda öz milli maraqları çərçivəsində fəaliyyət göstərir və dünya bazarının Qazaxıstan neftinə ehtiyac duyduğunu yaxşı anlayır.

“Qazaxıstan bu gün öz milli maraqlarına uyğun hərəkət edir. Biz bilirik ki, dünya Qazaxıstan neftinə ehtiyac duyur və biz tərəfdaşlarımız üçün etibarlı təchizatçı olaraq qalırıq. Hörmüz boğazındakı məhdudiyyətlər fonunda tərəfdaşlarımız bizdən neft tədarükünü artırmağı xahiş edirlər”, - deyə Akkenjenov bildirib.

Nazir vurğulayıb ki, ölkənin neft hasilatını artırmaq imkanları müəyyən infrastruktur məhdudiyyətləri ilə üzləşir. Onun sözlərinə görə, Qazaxıstanın ixrac həcmlərini artırmaq üçün istifadə edə biləcəyi alternativ nəqliyyat marşrutları mövcuddur, lakin bu marşrutlar kifayət qədər bahalıdır.

Hörmüz boğazı dünya neft ticarəti üçün strateji əhəmiyyət daşıyan əsas nəqliyyat dəhlizlərindən biridir. Qlobal neft tədarükünün təxminən 20 faizi bu marşrut vasitəsilə həyata keçirilir. ABŞ və İsrailin İrana qarşı hərbi əməliyyatlara başlamasından sonra boğazda məhdudiyyətlərin tətbiq edilməsi beynəlxalq enerji bazarlarına ciddi təsir göstərib.