“Azərbaycanda əsas infrastruktur məsələləri öz həllini tapmışdır” – bu fikirlər möhtərəm cənab Prezident İlham Əliyevin ölkəmizin inkişaf yolunu dəqiq və aydın şəkildə ifadə edən strateji baxışının bariz nümunəsidir. Bu cümlə əslində təkcə bir nəticə deyil, uzun illər ərzində aparılan düşünülmüş, ardıcıl və məqsədyönlü dövlət siyasətinin yekunudur.

Müasir Azərbaycanın bugünkü inkişaf səviyyəsinə çatmasında infrastruktur sahəsində atılan addımlar həlledici rol oynamışdır. Yol-nəqliyyat şəbəkəsinin yenidən qurulması, regionlarda müasir avtomobil yollarının salınması, körpü və tunellərin inşası ölkədaxili əlaqələri gücləndirmiş, regionların sosial-iqtisadi inkişafına yeni imkanlar açmışdır. Bu gün ölkənin ən ucqar kəndlərinə qədər keyfiyyətli yolların çəkilməsi dövlətin vətəndaşa göstərdiyi diqqət və qayğının real göstəricisidir.

Eyni zamanda, enerji infrastrukturu sahəsində görülən işlər Azərbaycanın enerji təhlükəsizliyini tam təmin etmişdir. Elektrik stansiyalarının yenilənməsi, qazlaşdırma səviyyəsinin əhəmiyyətli dərəcədə yüksəlməsi, alternativ və bərpa olunan enerji layihələrinin həyata keçirilməsi ölkəmizi bu sahədə də regionun aparıcı dövlətlərindən birinə çevirmişdir. Bu gün Azərbaycan təkcə öz ehtiyaclarını ödəyən deyil, eyni zamanda enerji ixrac edən etibarlı tərəfdaş kimi tanınır.

Su və kanalizasiya sistemlərinin yenilənməsi, içməli su layihələrinin icrası da infrastruktur siyasətinin vacib istiqamətlərindən biridir. Xüsusilə regionlarda əhalinin uzun illər qarşılaşdığı problemlərin aradan qaldırılması insanların yaşayış səviyyəsinin yüksəlməsinə birbaşa təsir göstərmişdir. Bütün bunlar sosial rifahın təmin olunmasına xidmət edən əsas amillərdəndir.

Cənab Prezident İlham Əliyevin vurğuladığı bu fikir həm də gələcəyə inam mesajıdır. Çünki əsas infrastruktur məsələlərinin həlli artıq növbəti mərhələyə – dayanıqlı inkişaf, innovasiya və rəqabətqabiliyyətli iqtisadiyyat quruculuğuna keçid üçün möhkəm zəmin yaratmışdır.

Nəticə etibarilə demək olar ki, Azərbaycanda infrastruktur sahəsində əldə olunan nailiyyətlər təsadüfi deyil. Bu uğurlar güclü siyasi iradənin, uzaqgörən strategiyanın və xalqın rifahını hər şeydən üstün tutan dövlət siyasətinin məntiqi nəticəsidir. Bu gün qürurla deyə bilərik ki, müasir və güclü Azərbaycanın təməli məhz bu düşünülmüş infrastruktur quruculuğu üzərində inşa edilmişdir.

İsa Məmmədov,
YAP Babək rayon təşkilatının sədri