2025-ci il ölkəmizin ən yeni tarixinə Qarabağda və müxtəlif bölgələrimizdə aparılan genişmiqyaslı quruculuq işləri, idarəetmə  sahəsindəki məqsədyönlü və davamlı islahatlar, beynəlxalq arenada yeni uğurların qazanılması, Azərbaycan-Ermənistan münasibətlərinin daha konstruktiv  mərhələyə qədəm qoyması və milli diplomatiyamızın nailiyyətləri kimi mühüm hadisələrlə yazıldı. Konstitusiya və suverenlik ili olaraq elan edilən bu dövrdə  ölkənin daxili siyasətində, o cümlədən, kadr seçimində aparılan islahatlar xüsusi önəm daşıyır. Elə bu anlamda ölkə başçımızın 12 noyabr tarixində yeni təyin olunan kadrlarla keçirdiyi görüşdə səsləndirdiyi fikirlər gələcək yol xəritəsinin  müəyyənləşdirilməsində böyük əhəmiyyət kəsb edir.

12 noyabr 2025-ci il tarixində dövlət başçımız  İlham Əliyevin Naxçıvan Muxtar Respublikasında Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul etməsi, dövlət idarəçiliyi sistemində növbəti islahat mərhələsinin davamıdır. Görüşdə möhtərəm Prezidentin səsləndirdiyi fikirlər göstərdi ki, regional idarəetmədə əsas prioritet şəffaflıq, məsuliyyət və xalqla birbaşa ünsiyyət prinsipinə əsaslanan idarəçilik modelinin möhkəmləndirilməsidir. İlham Əliyev xüsusilə vurğuladı ki, təyin olunan kadrlar qarşısında duran əsas vəzifə təkcə inzibati funksiyaları icra etmək deyil, həm də yerli problemlərin operativ həlli, vətəndaş məmnunluğunun təmin olunması və dövlət siyasətinin bölgələrdə effektiv həyata keçirilməsidir. Cənab Prezidentin çıxışı həm də ölkənin ümumi inkişaf konsepsiyasında yeni dövrün – səmərəli, dinamik və hesabatlı idarəetmə dövrünün başlanğıcını ifadə edir.

Prezident İlham Əliyevin “Sizə böyük etimad göstərilir, əminəm ki, bu etimadı doğruldacaqsınız” sözləri dövlət rəhbərinin kadr siyasətində əsas prinsipin etimad və məsuliyyət balansı üzərində qurulduğunu açıq şəkildə göstərir. Bu, həm siyasi sabitliyin, həm də icra intizamının qorunması baxımından vacib amildir. Cənab Prezidentin vurğuladığı kimi, hər bir icra başçısı təyinatını şəxsi uğur deyil, xalqa xidmət üçün məsuliyyət kimi qəbul etməlidir. “Xalqla bir yerdə olmaq” çağırışı həm mənəvi, həm də siyasi mesaj daşıyır — dövlət məmuru və vətəndaş arasında məsafənin aradan qaldırılması, sosial ədalətin və etimadın möhkəmləndirilməsi baxımından əhəmiyyətlidir.

Dövlət başçısının “Rəhbər vəzifədə çalışan hər bir şəxs, hər bir məmur təvazökar olmalıdır” fikri idarəetmədə mənəvi məsuliyyətin siyasi məsuliyyət qədər vacib olduğunu göstərir. Cənab Prezident  bir daha qeyd etdi ki, məmurun şəxsi davranışı və onun ailə üzvlərinin cəmiyyət qarşısındakı davranış tərzi dövlətin imicinə təsir göstərən amildir. Korrupsiya və rüşvətxorluğa qarşı sərt mövqe, təvazökarlığın və xidmət mədəniyyətinin dövlət məmurunun əsas keyfiyyəti kimi təqdim olunması prezidentimizin idarəçilik fəlsəfəsinin mərkəzində duran “məsuliyyətli liderlik” prinsipinə söykənir.

Cənab Prezidentin çıxışında regionların sosial-iqtisadi inkişafına dair səsləndirdiyi faktlar Azərbaycanın davamlı modernləşmə xəttini uğurla davam etdiyini nümayiş etdirdi. İlham Əliyev qeyd etdi ki, elektrik enerjisi, su təchizatı, magistral və kənd yolları, sosial infrastruktur layihələri – məktəblər, xəstəxanalar, idman obyektləri artıq ölkənin bütün bölgələrində müasir tələblərə cavab verir. Bu, təkcə iqtisadi deyil, həm də sosial siyasətin balanslı şəkildə həyata keçirilməsinin göstəricisidir.

Regionlarda yaradılan bu infrastruktur həm əhalinin həyat keyfiyyətini yüksəldir, həm də dövlət idarəçiliyində “mərkəzdən bölgələrə” prinsipinin reallaşmasına şərait yaradır. Cənab prezidentin vurğuladığı kimi, bu proseslər dövlət proqramlarının sistemli icrası və məqsədyönlü sərmayə siyasətinin nəticəsidir.

Möhtərəm prezidentimizin çıxışında səsləndirdiyi fikirlərdən aydın görünür ki, Azərbaycanın dövlət idarəçiliyi artıq nəticəyönümlü və ictimai nəzarətə açıq modelə doğru hərəkət edir. Bu modeldə əsas meyarlar — şəffaflıq, hesabatlılıq və etik davranışdır. Yeni təyin olunan məmurlar üçün verilən tapşırıqlar həm siyasi iradənin, həm də idarəçilikdə modern düşüncənin təcəssümüdür.

Bu kontekstdə Prezidentin “Əyri yola gedən hər bir dövlət məmuru nəticədə məhkəmə qarşısında cavab verir” fikri dövlətin prinsipial mövqeyini və hüquqi məsuliyyət mexanizminin sarsılmazlığını bir daha təsdiqlədi.

Prezident İlham Əliyevin “əsas prinsip sosial ədalət prinsipidir” fikri çağdaş Azərbaycan idarəçilik modelinin mahiyyətini müəyyənləşdirir. Dövlət başçısının vurğuladığı kimi, vətəndaşların etimadını qazanmaq üçün ədalət prinsipi yalnız hüquqi deyil, həm də mənəvi və sosial kateqoriya kimi önə çıxmalıdır.

Cənab Prezident açıq şəkildə bildirdi ki, bölgələrdə insanların narahat edən problemlərin aradan qaldırılması dövlətin əsas prioritetlərindəndir. Bu, sadəcə sosial siyasətin yox, həm də demokratik legitimliyin təməl göstəricisidir. “Hər bir bölgədə insanlar bilməlidirlər ki, ədalət hər zaman üstünlük təşkil edir” – bu çağırış idarəetmədə səmimiyyət və xalqla yaxınlığın siyasi prinsipə çevrildiyini göstərir.

Prezident İlham Əliyev çıxışında mərkəzi və yerli icra hakimiyyətlərində aparılan kadr islahatları nəticəsində vəziyyətin “böyük dərəcədə sağlamlaşdırıldığını” qeyd edərək, bu istiqamətdə qətiyyətli siyasi iradəni bir daha nümayiş etdirdi.

Dövlət başçısının “sizə heç kim qanunsuz tapşırıq verə bilməz” fikri idarəetmədə hüquqi prinsiplərin əhəmiyyətini ifadə edir. Bu, həm korrupsiyaya qarşı sistemli mübarizənin, həm də qanunun aliliyinin bərqərar olması istiqamətində mühüm siyasi mesajdır.

Prezident İlham Əliyev bölgələrdə məşğulluğun artırılmasını sosial rifah siyasətinin əsas dayağı kimi təqdim etdi. Dövlət başçısı qeyd etdi ki, miqrasiyanın səbəblərindən biri hələ də bölgələrdə iş yerlərinin məhdud olmasıdır. Buna görə də, dövlətin əsas məqsədi yerli istehsal və sahibkarlığın dəstəklənməsi, yeni müəssisələrin yaradılması və özünüməşğulluq proqramlarının genişləndirilməsidir.

Bu siyasət həm sosial sabitliyi möhkəmləndirir, həm də regional iqtisadiyyatın dayanıqlı inkişafına təkan verir. Cənab Prezidentin vurğuladığı kimi, kənd təsərrüfatı və turizmin paralel inkişafı bölgələrin iqtisadi strukturunda sinerji effekti yaradacaq.

Dövlət başçısının çıxışında mühüm yer tutan digər məsələ – ekoloji tarazlığın qorunması və ətraf mühitin sağlamlaşdırılmasıdır. Cənab Prezident xatırlatdı ki, vaxtilə Bakı və Sumqayıt “ekoloji fəlakət şəhərləri” kimi tanınsa da, bu gün onlar “parklar şəhərləri”nə çevriliblər.

“Qara şəhəri Ağ şəhərə çevirdik” ifadəsi təkcə şəhərsalma uğurunun simvolu deyil, həm də müasir ekoloji siyasətin fəlsəfəsidir..

Prezident İlham Əliyevin 12 noyabr 2025-ci il tarixli çıxışı dövlət idarəçiliyində dərin ideoloji xəttin – ədalət, şəffaflıq, məsuliyyət və xalqla birliyin strateji ifadəsidir. Bu, həm siyasi islahatların, həm də ictimai etimadın yeni mərhələsini müəyyənləşdirir. Dövlət başçısının sözləri göstərir ki, müasir Azərbaycan təkcə iqtisadi göstəricilərlə deyil, ədalətli idarəetmə prinsipləri ilə də inkişaf edir.

12 noyabr çıxışı dövlət idarəçiliyinin yeni mərhələsinin siyasi manifesti olaraq dəyərləndirilə bilər. Prezident İlham Əliyevin vurğuladığı kimi, dövlət məmurunun əsas vəzifəsi xalqa xidmət etmək, cəmiyyətlə birgə inkişaf yolunu seçməkdir. Bu, yalnız bir idarəçilik formulu deyil, eyni zamanda müasir Azərbaycan dövlətçiliyinin ideoloji və mənəvi dayağıdır.

Ziyafət ƏSGƏROV,
Azərbaycan Respublikası  Milli Məclisinin Sədr müavini