ABŞ Prezidenti Donald Tramp Yaponiyaya səfəri zamanı bu ölkənin Baş naziri Sanae Takaiti barədə belə deyib: “Onunla danışıqlar aparmaq çətindir. Demək istədiyim budur ki, az əvvəl ilk raket partiyasını artıq təsdiqlədim”.

“İki sahil” xəbər verir ki, Prezidentin sözlərinə görə, bu, Yaponiyanın Özünümüdafiə Qüvvələrinə F-35 qırıcıları üçün göndəriləcək ilk raket tədarüküdür. “Onlar da bu həftə gətiriləcək, yəni qrafikdən irəlidə gedirik. Odur ki, xanım Baş nazirə sadəcə demək istəyirəm ki, onlar bu raketləri gözləyirdilər və biz dərhal onları tədarük etdik”, – deyə Tramp vurğulayıb.

Prezident raketlərin dəqiq növünü və sayını açıqlamayıb.