“Yerkrapa” terror dəstəsi Ermənistan ordusunun bir hissəsidir
Hazırda Ermənistanda qanunlar işləmir, ağız deyəni qulaq eşitmir, ordu vahid komandanlığa tabe deyil, bir sözlə, tam dərəbəylikdir. Yarıtmaz Nikol Paşinyan hökuməti ölkədə baş verən proseslərə əhatəli nəzarət edə bilmir. Bunu xarici siyasətdə, kilsədə, cəmiyyətdə s. istiqamətlərdə də görmək olar. Sadəcə, revanşist müxalifət Qərbə yuvarlanmış Nikol Paşinyan iqtidarı ilə Rusiyanın arasında olan gərgin vəziyyəti daha da qızışdırıb pik həddə çatdırmağa, Ermənistanı əvvəlki ağasının qarşısında lakey vəziyyətinə salmağa çalışır. Məqsəd odur ki, bu minvalla da hakimiyyəti dəyişib birinci kürsüyə Moskvaya sadiq birisini ooturtmağa nail olsunlar. Həmin radikal qüvvələrin marağı həm də Rusiya-Azərbaycan əlaqələrini korlamağa hesablanmışdır. Çünki Azərbaycan sərbəst bir addım atanda ermənilər dərhal bunun Rusiyanın əleyhinə olduğunu hallandırırlar. Prezident İlham Əliyevin Moskvaya 9 may hərbi paradına getməməsi avantürçı erməniləri ruhlandırmışdı. Həmin günlərdə Rusiyadakı erməni diasporu Azərbaycanla bu ölkə arasında ciddi narazılıq yaraatmaq üçün hansı hoqqalardan çıxmadı? Onlar Rusiyanın hər yerində yığıncaqlar keçirir, yaltaqlıqla özlərini imperiyanın dostu, azərbaycanlıları isə düşməni adlandırırdılar. Tanıdığımız türk düşməni Konstantin Zatulin də belə tədbirlərə dəvət olunurdu. Yəni, burada onların ikibaşlı hədəfi açıq görünür. Bütün bunlar hələ bir yana qalsın.
Ermənistan Azərbaycanla razılaşıb ki, sərhəddə kənar hərbi qüvvələr olmasın. Yəni, bu qərar xüsusən də Avropa İttifaqının mülki müşahidə missiyasına aiddir. Ermənistan çalışdı ki, bu razılaşma yalnız delimitasiya edilmiş ərazilərə şamil olunsun. Ancaq rəsmi Bakı tələb etdi ki, bütün sərhədboyu yerləşdirilən üçüncü qüvvə çıxarılmalıdır.
Bu günlərdə Azərbaycanla sərhədə 1993-cı ildə təşkil olunmuş başkəsənlərdən ibarət “Yerkrapa” adlandırılan könüllü terrorçu dəstənin göndərilməsi barədə informasiya yayılıb. Əvvəllər bu dəstənin 7 min üzvü olduğu bildirilsə də faktik olaraq 10 minə qədər üzvü olduğu deyilir. Təşkil olunduğu ilk illərdə hətta onlardan bir neçə nəfəri Ermənistan parlamentinə deputat da “seçilmişdilər.”
Bu terror qrupu ölkənin ordu komandanlığına və hökumətə tabe deyil. Xatırladaq ki, onu sonralar Ermənistanda müdafiə naziri işləmiş general Vazgen Sarkisyan təşkil edib. Sonra onu general-leytenant Manvel Qriqoryan əvəz edib. 2020-ci ildə Qarabağın azad edildiyini eşidən generalın ürəyi partlayaraq ölüb. Hazırda terrorçulara Sasun Mikaelyan adlı birisi başçılıq edir. Qəddarlıqda, işgəncə verməkdə hər üçü biri-birindən geri qalmayıb. Vurğulamaq lazımdır ki, bu təşkilata əmrləri Rusiyanın hərbi agentura şəbəkəsindən tutmuş “Qarabağ klanı”nın keçmiş rəhbərlərinə qədər olan şəxslər verirlər. Buna görədir ki, Rusiya eks-prezidentlər Robert Koçaryanla Serjik Sarkisyanın həbs olunmaması üçün əlindən gələni edir.
Rəsmi Bakının İrəvandan tələbləri sırasına “Yerkrapa” qruplaşması tərksilah olunaraq sərhəddən uzaqlaşdırılmalıdır” şərti də əlavə olunmalıdır. Çünki yaxşı silahlandırılmış terrorçu birləşməsi real təhlükədən xəbər verir. Avropa İttifaqına və rəsmi Brüsselə də sualımız var: Əgər erməni snayperləri Azərbaycan Ordusunun mövqelərinə atəş açırsa, sizin Ermənistandakı fəaliyyətinizin mənası nədir, nəyi monitorinq edirsiniz? Bunlar Azərbaycan ərazisinə durbinlərlə baxmaq əvəzinə, həmin durbinləri özlərinin arxa tərəflərinə çevirib baxmalıdırlar. Əsl təhlükə onların arxa tərəfindədir. Arxalarında dinc durmayan əlisilahlı “Yerkrapa” terrorçuları günün birində onların müdafiə etdikləri baş nazir Nikol Paşinyanın taxtını başına çevirər, avropalıların ayaqlarını çox güvəndikləri Ermənistandan həmişəlik kəsər. Bunu başa düşmək bu qədərmi çətindir? Yəni, belə yerdə yaxşı deyiblər: Papağı keçi dərisindən, xəbəri yoxdur gerisindən...
Vəli İlyasov, “İki sahil”
