Almaniya Federativ Respublikasının Prezidenti Frank-Valter Ştaynmayerin Azərbaycana səfəri iki ölkə arasında münasibətlərin inkişafında mühüm mərhələ hesab edilir. Azərbaycan Prezidenti İlham Əliyevlə Almaniya Federativ Respublikasının Prezidenti Frank-Valter Ştaynmayerin səfər çərçivəsində ikitərəfli və nümayəndə heyəti ilə birlikdə apardıqları müzakirələr olduqca əhəmiyyətlidir. Səfər həmçinin dövlətlər arasındaı qarşıya qoyulan vəzifələrin və qarşılıqlı maraq doğuran məsələlərin həllinə öz müsbət töhfəsini verəcək.
“İki sahil” xəbər verir ki, bu sözləri YAP Təftiş Komissiyasının sədri, Milli Məclisin deputatı Sevinc Hüseynova deyib.
Deputat dövlət başçılarının mətbuata verdiyi bəyanatlarda toxunduğu məqamlara diqqət çəkib. O bildirib ki, mətbuata verilən birgə bəyanatda Prezident İlham Əliyev Almaniya Prezidentinin Azərbaycana səfərinin əhəmiyyətindən bəhs edərək, bunun əlaqələrimizə yeni müsbət təkan verəcəyini vurğulayıb: “Dövlət başçıları təkbətək görüşdə söhbət əsnasında, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafını müzakirə edib. Azərbaycan Prezidenti iki dövlət arasında iqtisadi sahədə əldə edilmiş nəticələrdən bəhs edib. Bu ilin yanvar-fevral aylarında Azərbaycanla Almaniya arasındakı ticarət dövriyyəsinin təxminən üç dəfə artdığı qeyd olunub. Bunun əsas səbəblərindən biri kimi Azərbaycandan Almaniyaya ixrac edilən xam neftin həcminin artmasının olduğu bildirilib. Gələcəkdə ölkələr arasında ticarət dövriyyəsinin şaxələndirilməsi ilə bağlı hədəflərin olduğunu diqqətə çatdırılıb. Bərpaolunan enerji sahəsində Almaniya şirkətlərinin təcrübəsinin tətbiqinin mümkünlüyü vurğulanıb. Azərbaycanın bu istiqamətdə çox böyük proqramı və planları olması fonunda xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq hədəfi var. Bununla da istehsal edilən enerjinin bir hissəsinin Avropaya ixracı mümkün olacaq”.
Komissiya sədri Prezident İlham Əliyevin mətbuat bəyanatında ötən il Bakıda keçirilən COP29 beynəlxalq iqlim konfransının uğurlu nəticələrindən bəhs etdiyini bildirib: “Ötən il Azərbaycan COP29 beynəlxalq iqlim konfransına ev sahibliyi istiqamətində Almaniya ilə çox fəal əməkdaşlıq edib. COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu amil onun qlobal əhəmiyyətli bir konfrans olduğunu, uğurlu nəticələrlə yadda qaldığını bir daha təsdqiləmiş olur. Ermənistan isə bu beynəlxalq tədbirə qatılmayıb. Azərbaycanla Ermənistan arasında normallaşma prosesinin uğurla getdiyi bir zamanda İrəvanın bu beynəlxalq konfransa qatılmamasının başa düşülən olmadığı Prezident İlham Əliyev tərəfindən də vurğulanıb”.
Sevinc Hüseynova bildirib ki, Azərbaycanın 30 il ərzində Ermənistanın işğalından əziyyət çəkdiyi, xalqımızın etnik təmizləməyə məruz qaldığı, bir milyon azərbaycanlının məhz erməni aqressiyasına görə ev-eşiyindən didərgin düşdüyü ölkə başçısı tərəfindən qeyd olundu: “Azərbaycan torpaqlarının 20 faizinin Ermənistan tərəfindən işğal edildiyi, beynəlxalq təşkilatların bu məsələdə ciddi addım atmadığı diqqətə çatdırılıb. Yalnız Azərbaycanın bu münaqişəni və beynəlxalq hüququ döyüş meydanında və siyasi müstəvidə həll etdiyi Almaniya prezidentinin və nümayəndə heyətinin iştirak etdiyi mətbuat konfransında bəyan olunub. Məhz Azərbaycanın əldə etdiyi tarixi Zəfər sülh danışıqlarına yol açıb. Bu gün Azərbaycan regional və qlobal miqyasda yaratmış olduğu yeni reallığın sülhə və təhlükəsizliyə xidmət etdiyi bir daha qeyd edilib”.
