Mikayıl Yusifov: Qadınların sahibkarlıq vasitəsilə iş həyatına qatılmalarını artırmaq həm fərdi, həm də cəmiyyət səviyyəsində dayanıqlı inkişafı gücləndirəcəkdir
Türkiyənin ən böyük birbaşa xarici investoru və ən iri inteqrasiya olunmuş sənaye qrupu olan “SOCAR Türkiyə” sosial sahəyə yönəlmiş layihələrinə daha bir yenisini əlavə etdi. Belə ki, Türkiyə Sahibkarlıq Vəqfi (GİRVAK) ilə əməkdaşlıq çərçivəsində qadınların iqtisadi və sosial müstəqilliyini dəstəkləmək məqsədilə həyata keçirilən “Sahibkarlıqda Qadın Enerjisi” Proqramı, “SOCAR Türkiyə”nin Aliağada yerləşən Neftayırma və Petrokimya İş Birliyinin idarəetmə binasında təşkil edilən təqdimat tədbiri ilə başlayıb.
İzmir şəhərinin Aliağa bölgəsində yaşayan və nə təhsildə, nə də məşğulluqda yer almayan (NEET) qadınlara yönəlmiş genişmiqyaslı sahibkarlıq və bacarıq inkişafı prosesi təqdim edən proqram çərçivəsində ilk mərhələdə 50 qadın sahibkarlıq yoluna qədəm qoyub. Səkkiz ay davam edəcək proqramda iştirakçılar sahibkarlıq ideyalarını reallaşdırmaq üçün lazımi bilik və bacarıqları əldə edəcək, iş dünyasında qalıcı yer tutmaları üçün mentorluq dəstəyindən faydalanacaqlar.
“SOCAR Türkiyə” qadınların iqtisadi və sosial baxımdan güclənməsini dəstəkləyir
Aliağada keçirilən təqdimat mərasimində çıxış edən “SOCAR Türkiyə”nin baş icraçı direktorun kommunikasiya və ictimaiyyətlə əlaqələr üzrə müavini Mikayıl Yusifov proqram haqqında məlumat verib: "Fəaliyyət göstərdiyimiz bölgələrdə sosial xidmət göstərmək və iqtisadi inkişafı dəstəkləmək korporativ vətəndaşlıq prinsipimizin əsasını təşkil edir. Bu anlayışa uyğun olaraq, qadınların iqtisadi və sosial baxımdan güclü fərdlər olması üçün “Sahibkarlıqda Qadın Enerjisi” Proqramı ilə üzərimizə məsuliyyət götürürük. Qadınların sahibkarlıq vasitəsilə iş həyatına qatılmalarını artırmaq həm fərdi, həm də cəmiyyət səviyyəsində dayanıqlı inkişafı gücləndirəcəkdir.”
Türkiyə Sahibkarlıq Vəqfinin baş direktoru Mehru Öztürk isə proqramın əhəmiyyətinə diqqət çəkib: "Sahibkarlıq təkcə fərdlərin iqtisadi baxımdan güclənməsinə kömək etmir, eyni zamanda, sosial dəyişimin ən güclü dinamiklərindən biri kimi innovasiyanı və dayanıqlı inkişafı təşviq edir. Bu proqram Aliağadakı qadınların xəyallarını real biznes modellərinə çevirmələri üçün lazım olan bilik, bacarıq və dəstək şəbəkəsini təmin edir. Qadınların iqtisadiyyata bərabər qatılımı təmin olunmadan sahibkarlıq ekosisteminin tam inkişafı mümkün deyil. “SOCAR Türkiyə” ilə birlikdə bu proqramı həyata keçirməklə, sahibkarlığın qadınlar üçün əlçatan, davamlı və gücləndirici bir yol olmasına töhfə verməyi hədəfləyirik.”
İqtisadi və sosial rifaha geniş dəstək
“Sahibkarlıqda Qadın Enerjisi” Proqramı qadınların sahibkarlıq bacarıqlarını inkişaf etdirməsinə imkan yaratmaqla yanaşı, onların iqtisadi və sosial rifahını gücləndirəcək müxtəlif dəstəklər də təqdim edir. Proqram çərçivəsində iştirakçılar özünəinamın artırılması və stresin idarə olunması kimi mövzularda psixososial dəstək alacaqlar. Maliyyə savadlılığı və e-ticarət təlimləri vasitəsilə onların iqtisadi müstəqilliyi təşviq ediləcək və sahibkarlıq sahəsində ehtiyac duyacaqları əsas bacarıqları əldə etmələri təmin olunacaq.
Qadınlar arasında həmrəyliyi gücləndirmək məqsədilə qrup fəaliyyətləri, könüllülük layihələri və sosial tədbirlər təşkil ediləcək. Eyni zamanda, sahibkarlıq baxışını inkişaf etdirmək və problem həll etmə bacarıqlarını artırmaq üçün AR-GE və innovasiya yönümlü təlimlər və ideya seminarları keçiriləcək. “SOCAR Türkiyə”dən qadın liderlərin də iştirak etdiyi mentorluq proqramları və şəbəkələşmə tədbirləri sayəsində iştirakçılar sahibkarlıq yolunda güclü bir dəstək şəbəkəsi quracaqlar.
Qadın sahibkarlar bu proqram vasitəsilə öz iş ideyalarını inkişaf etdirməklə yanaşı, eyni zamanda, regional inkişaf prosesinə də töhfə verəcəklər.
Qeyd edək ki, proqram müddətində ilhamverici görüşlər, trendlər haqqında söhbətlər, mentorluq proqramları və “SOCAR Türkiyə” tərəfindən qadın liderlərin iştirakı ilə təşkil edilən tədbirlər sayəsində güclü bir dəstək və həmrəylik şəbəkəsi yaradacaqlar.
Orxan Vahidoğlu, “İki sahil”
