Azərbaycanda demokratik mühit, açıq cəmiyyət, şəffaf münasibətlər sistemi mövcuddur. Xalqımızın Ümummilli lideri Heydər Əliyevin əsasını qoyduğu demokratik prinsiplər ölkəmizdə açıq cəmiyyətin formalaşmasını təmin edib. Ümummilli Liderin uğurlu islahatlarını əzmlə davam etdirən Prezident İlham Əliyev Azərbaycanda inkişaf etmiş, demokratik norma və prinsipləri mənimsəmiş cəmiyyətin formalaşmasına nail olub. Bu gün cəmiyyətimiz öz istək və arzularını açıq şəkildə ifadə edə bilir və bunun üçün bütün təsisatlar mövcuddur. Ölkəmizdə 1993-cü ildən indiyə qədər keçirilmiş seçki proseslərində Azərbaycan cəmiyyəti heç bir maneə olmadan öz iradəsini ortaya qoyub. Ötən seçkilərdə olduğu kimi qarşıdan gələn növbədənkənar parlament  seçkilərində də şəffaflığın, demokratik prinsiplərin təmin olunması üçün bütün zəruri addımlar atılıb.

Hazırda ölkədə kifayət qədər uğurlu, sivil tələblərə cavab verən seçki mühiti mövcuddur. Beynəlxalq aləmin də seçkilərə yanaşması yetərincə adekvatdır. Bütün proseslər azad, şəffaf və ədalətli seçkilərin keçirilməsinə hesablanıb. Namizədlərin irəli sürülməsi, qeydə alınması, seçkiqabağı təşviqat kampaniyası, eləcə də bütün seçki subyektlərini əhatə edən digər irimiqyaslı proseslər qanunvericiliyin tələblərinə uyğun həyata keçirilib.

Mərkəzi Seçki Komissiyasının (MSK) sədri Məzahir Pənahov, rəqəmsal inkişaf və nəqliyyat naziri Rəşad Nəbiyev və Xüsusi Rabitə və İnformasiya Təhlükəsizliyi Dövlət Xidmətinin rəisi İlqar Musayev Milli Məclisə seçkilərlə əlaqədar avqustun 27-də MSK-nın inzibati binasında yerləşən veb-kameralara texniki nəzarət mərkəzinə baxış keçiriblər. Onlar proseslərin gedişi ilə yaxından tanış olub, seçkilərin şəffaflığının təmin edilməsində mühüm əhəmiyyət daşıyan veb-kameraların quraşdırılmasında seçki qanunvericiliyinin tələblərinə dəqiqliklə riayət olunmasının önəmini vurğulayıb və zəruri tövsiyələrini mütəxəssislərin diqqətinə çatdırıblar. Milli Məclisə seçkilərdə veb-kameraların tətbiqi layihəsini sıx əməkdaşlıq şəraitində birgə reallaşdıran qurumların rəhbərlərinə veb-kameraların quraşdırılması, tənzimlənməsi və seçki gününə tam hazır vəziyyətə gətirilməsi istiqamətində intensiv şəkildə aparılan son hazırlıq işləri barədə məlumat verilib.

Qeyd olunub ki, ilk dəfə ölkəmizin bütün suveren ərazilərində keçirilməklə əlamətdar ictimai-siyasi hadisəyə çevrilən Milli Məclisə seçkilərdə də müxtəlif metod və vasitələrdən istifadə edilməklə şəffaflığın yüksək səviyyədə təminatına xüsusi diqqət yetirilib. Belə ki, 16 ildir müvəffəqiyyətlə reallaşdırılan və səmərəliliyi ilə öz təsdiqini tapmış veb-kamera layihəsi qarşıdan gələn seçkilərdə də davam etdirilir. Seçki günü – sentyabrın 1-də səsvermə məntəqələrində proseslərin tamamilə müşahidə edilməsi məqsədilə 1000 seçki məntəqəsində texniki parametrləri daha da gücləndirilərək təkmilləşdirilmiş və yüksək görüntü effektinə malik veb-kamera quraşdırılıb. İnternet istifadəçiləri seçki günü istər ölkə daxilindən, istərsə də ölkə hüdudlarından kənarda Mərkəzi Seçki Komissiyasının rəsmi internet səhifəsinə daxil olmaqla, heç bir qeydiyyat tələb edilmədən bütün prosesləri - səsvermə, səslərin sayılması və nəticələrin müəyyənləşdirilməsini arasıkəsilmədən birbaşa müşahidə etmək imkanına malik olacaqlar.

Azərbaycanda keçirilən seçkilər daim fərqli aşkarlıq institutlarının, çoxsaylı yerli və beynəlxalq müşahidəçilərin, media nümayəndələrinin sərbəst iştirakı ilə xarakterizə olunub. İnformasiya-kommunikasiya texnologiyalarının ən son nailiyyətlərinin uğurla tətbiqi nəticəsində şəffaflığın miqyası daha da genişlənib, bütün seçki günü proseslərini hər hansı bir maneə ilə rastlaşmadan, əvvəldən axıradək fasiləsiz müşahidə aparmaq imkanı yaranıb.

Milli Məclisə seçkilərin müşahidəsi ilə əlaqədar MSK 27 tərəfdaş ali seçki qurumuna dəvət göndərib. Onlardan yeddisinin sədri bilavasitə seçki prosesinin müşahidəsində iştirak edəcək. Ümumiyyətlə, dəvət olunan qurumların böyük əksəriyyəti seçkilərə müşahidəçi kimi qoşulacaqlar. İndiyə qədər emal olunmuş məlumata əsasən, sentyabrın 1-də keçiriləcək Milli Məclisə seçkilərlə əlaqədar 69 ölkə və 50 qurumdan olan 604 nəfər beynəlxalq müşahidəçi qeydə alınıb.

Hazirda cəmiyyətimizdə yüksək seçki əhval-ruhiyyəsi mövcuddur ki, bu da insanlarımızın proses haqqında məlumatlı olması və səsvermədə  fəal iştirak etməsi faktını ortaya qoyur. Ona görə də  tam məsuliyyətlə demək olar ki, qarşıdan gələn növbədənkənar  parlament seçkiləri Azərbaycanın demokratik inkişafına töhfə verəcək və ölkəmizin bu tarixi sınaqdan da uğurlu çıxmasını şərtləndirəcək.

Şəmsiyyə Əliqızı, “İki sahil”