Dünyanın ən nadir göz rəngləri insan gözündə müxtəlif genetik mutasiyaların və nadir genetik kombinasiyaların nəticəsi olaraq yaranan rənglərdir. Bu göz rəngləri dünya əhalisinin çox kiçik bir faizində müşahidə olunur və unikallıqları səbəbindən böyük maraq doğurur. Göz rənginin formalaşması adətən melanin miqdarı ilə əlaqələndirilir. Bəzi hallarda isə bu rənglər qeyri-adi genetik variasiyalar nəticəsində meydana gəlir.

Budur, dünya üzrə ən az rast gəlinən və ən çox maraq doğuran göz rəngləri:

Kəhrəba göz rəngi

Kəhrəba göz rəngi nadir rast gəlinən və maraqlı göz rənglərindən biridir. Bu rəng qızılı, sarımtıl və ya kəhrəba tonlarının qarışığı kimi görünür. Kəhrəba göz rəngi əslində çox az miqdarda melanin və lipidlərdən ibarət olan çox nadir bir iris rəngidir. Gözlərdəki bu qeyri-adi rəng işıqda parlaq, isti bir parıltı verir və xüsusilə günəş işığında fərqli bir şəkildə diqqət çəkir. Kəhrəba göz rəngi ən çox Asiya və Cənubi Amerika ölkələrində müşahidə edilir. Dünya üzrə çox nadir olduğuna görə xüsusi bir cazibəyə sahibdir.

Bənövşəyi göz rəngi

Bənövşəyi göz rəngi ən nadir və qeyri-adi göz rənglərindən biri hesab olunur. Bu rəng əsasən genetik mutasiyalar və ya müəyyən göz xəstəliklərinin nəticəsi olaraq meydana gəlir. Əslində bənövşəyi gözlər mavi və qırmızı alt tonların birləşməsi ilə yaranır. İrisdə mavi piqmentin işıq ilə birləşməsi bənövşəyi və ya tünd bənövşəyi rəng effektini yarada bilər. Bu göz rəngi təbii olaraq çox az insanda rast gəlinir və daha çox irsi xüsusiyyətlərdən qaynaqlanır.

Bənövşəyi gözlər ən çox çox az melanin miqdarı olan insanlarda müşahidə edilir və bu göz rəngini daha da unikal edir. Belə bir göz rənginə sahib insanlar nadir hallarda görüldüyü üçün diqqət çəkir və bu rəng əsrarəngiz,  gözəl bir xüsusiyyət olaraq qəbul edilir.

Heterokromiya və anizokoriya göz rəngi

Heterokromiya və anizokoriya göz rəngi maraqlı və nadir fenomendir. Lakin hər ikisi fərqli göz xüsusiyyətlərini təsvir edir. Heterokromiya bir insanın hər iki gözünün fərqli rəngdə olması və ya eyni gözdə bir neçə rəngin olması vəziyyətidir. Heterokromiya iki əsas növdə olur. Tam heterokromiyada hər iki göz tamamilə fərqli rənglərə sahibdir. Məsələn, bir göz mavi, digəri isə qəhvəyi ola bilər. Sektoral heterokromiya isə eyni gözün içində fərqli rənglərin olmasıdır. Heterokromiya adətən genetik faktorlardan bəzən isə göz travmaları və ya müəyyən xəstəliklərdən qaynaqlanır. Bu vəziyyət çox nadir olsa da, heyranlıq yaradan unikal bir göz rəngi xüsusiyyəti kimi qəbul edilir.

Anizokoriya isə göz bəbəklərinin fərqli ölçüdə olmasıdır. Bir göz bəbəyi digərindən daha böyük və ya daha kiçik olur. Anizokoriya nevroloji problemlər, göz travmaları və ya bəzi göz xəstəlikləri səsbəbilə yarana bilər. Normal vəziyyətdə də kiçik fərqlər ola bilər, lakin böyük ölçü fərqi bəzən ciddi tibbi araşdırma tələb edir.

Anizokoriya və heterokromiya göz rəngləri nadir hallarda müşahidə olunsa da, insan gözündə unikal və diqqətçəkici xüsusiyyətlər yaradır.

Boz göz rəngi

Boz göz rəngi dünyada nadir rast gəlinən və sirli bir cazibəyə malik olan göz rənglərindən biridir. Bu rəng mavi gözlərə bənzəsə də iris piqmentasiyasındakı fərqliliklər səbəbindən daha solğun və gümüşü bir ton alır. Boz gözlərdə melanin miqdarı çox azdır və irisdəki struktur işığın fərqli şəkildə əks olunmasına səbəb olur. Nəticədə gözlərdə boz, bəzən də yaşıl və ya mavi alt tonlar görünə bilər.

Boz göz rəngi əsasən Şimali və Şərqi Avropa ölkələrində yayılmışdır. Lakin dünyanın digər bölgələrində də nadir hallarda rast gəlinir. Bu rəng gözlərə dərin və sirli bir ifadə verir. Eyni zamanda,  günəş işığında və ya fərqli işıqlandırma şəraitində rəngi dəyişən təsirə malik ola bilərlər. Boz gözlər soyuq və sakit bir görünüş yaratdığı üçün tez-tez qeyri-adi və maraqlı bir gözəllik nümunəsi kimi qəbul edilir.

Nigar Orucova, “İki sahil”