İtaliya A Seriyasının XI turunun ötən gecə oynanılan mərkəzi görüşü - “Roma” - “Milan” matçı milanlıların 40 yaşlı isveçli hücumçusu Zlatan İbrahimoviç üçün yeni rekordla əlamətdar olub.

“İki sahil” xəbər verir ki, matçın 26-cı dəqiqəsində cərimə zərbəsindən vurduğu qolla oyunda hesabı açan futbolçu bununla İtaliya A Seriyasında 150-ci, karyerasında isə 400-cü dəfə fərqlənib.

Bu, Z.İbrahimoviçin həm də “Roma”nın qapısından keçirdiyi 14-cü qol olub. Futbolçu bu göstəriciyə 22 oyunda nail olub.

İsveçli futbolçu cari mövsümdə A Seriyasında keçirdiyi beş oyunda üç qol vurub və bir məhsuldar ötürmə edib.

Xatırladaq ki, “Olimpiko” stadionunda keçirilən oyun “Milan”nın 2:1 hesabı ilə qələbəsi ilə başa çatıb. Milanlıların ikinci qolunu 58-ci dəqiqədə Frank Kessye, “Roma”nın qolunu isə 90+3-cü dəqiqədə Stefan El-Şaravi vurublar. Bu qələbə sayəsində xal ehtiyatını 31-ə çatdıran “Milan” eyni xal toplayan “Napoli”dən sonra ikinci pillədə qərarlaşıb. “Roma” isə 19 xalla beşinci yerdədir.