"Mançester Yunayted"in futbolçusu Pol Poqba baş məşqçisi Ule Qunnar Sulşeri təhqir edib.

“İki sahil” xəbər verir ki, bu barədə "Daily Mail" nəşri məlumat yayıb.

Fransalı yarımmüdaiəçi Premyer Liqanın 9-cu turunda evdə "Liverpul"a 0:5 hesabı ilə uduzduqları görüşdən sonra Sulşerə qarşı təhqiramiz ifadələr işlədib. Çalışdırıcı 60-cı dəqiqədə qırmızı vərəqə alan 28 yaşlı oyunçuya iradını bildirərkən o, məşqçisinə qeyri-etik cavab verib. Poqba qırmızı vərəqəyə görə yalnız komanda yoldaşlarından üzr istəyib.

Qeyd edək ki, Pol Poqba 2016-cı ildən "qırmızı şeytanlar"da çıxış edir. Onun klubla müqaviləsi 2022-ci ilin yayına qədərdir.