ABŞ və İran qeyri-rəsmi (vasitəçilər vasitəsilə) danışıqlar zamanı münaqişənin nizamlanması planının həyata keçirilməsi mexanizminin və təminatların razılaşdırılması mərhələsinə keçiblər.

“İki sahil” xəbər verir ki, bu barədə Səudiyyə Ərəbistanının Al Arabiya telekanalı yüksək rütbəli mənbəyə istinadla məlumat yayıb.

"ABŞ və İran arasında dolayı danışıqlar planın icra mexanizminin müzakirəsi və təminatların verilməsi mərhələsinə keçib", – deyə telekanal müsahibinin sözlərindən sitat gətirir.

Onun məlumatına görə, vasitəçilər artıq Vaşinqtonun cavabını İranın xarici işlər naziri Abbas Araqçiyə çatdırıblar. Telekanalın həmsöhbəti qeyd edib ki, İranın təklif etdiyi yeddi günlük plan hər hansı irəliləyişdən danışmazdan əvvəl "ciddi düzəlişlərə" ehtiyac duyur. Eyni zamanda, hazırda əsas məsələlər razılaşmaların icra ardıcıllığı və tərəflərdən hansının birinci addım atacağıdır.

Bundan əvvəl Reuters agentliyi məsləhətləşmələrin gedişi ilə tanış olan rəsmi şəxsə istinadla xəbər vermişdi ki, Araqçi Dohada Qətər vasitəçiləri ilə görüş zamanı inamın möhkəmləndirilməsi üzrə təklif olunan plana dair Amerika tərəfinin şərhlərini alıb.