Rona prefekturası avqustun 16-da Lion şəhərində sağçı radikal “Save Europe Act” hərəkatının planlaşdırdığı aksiyaya qarşı keçirilməsi nəzərdə tutulan əks-nümayişi qadağan edib. Hakimiyyət qərarı şəhərdə ultra-sol və ultra-sağ qruplar arasında təkrarlanan və zorakı qarşıdurma mühitinin mövcudluğu ilə əsaslandırıb.

“İki sahil” xəbər verir ki, Rona prefekturasının yaydığı açıqlamaya görə, “Save Europe Act”ın aksiyasına qarşı nümayiş müxtəlif Lion kollektivləri, o cümlədən “Soulèvement de la Terre Lyon”, “Lyon Antifa”, həmçinin “NPA-Anticapitaliste” və “Attac”ın yerli bölmələri tərəfindən təşkil olunmuşdu.

Prefektura qeyd edib ki, “Save Europe Act”ın aksiyası da avqustun 15-də qadağan edilib. Hərəkatın təşəbbüsləri arasında “remiqrasiya” anlayışının təşviqi də yer alır. Əlavə olunub ki, hər iki aksiyanın keçirilməsi şəhərdə qarşıdurma və ictimai asayiş üçün risk yarada bilər.

Qərarın əsas səbəblərindən biri kimi “ultra-sol və ultra-sağ cərəyanlar arasında təkrarlanan və zorakı qarşıdurma konteksti” göstərilib. Hakimiyyət mümkün toqquşmaların və ictimai asayişin pozulmasının qarşısını almağı əsas məqsəd kimi təqdim edir.

“Save Europe Act” özünü vətəndaş hərəkatı kimi təqdim edir və Avropa İttifaqı çərçivəsində Qərbdən kənar yeni miqrasiya kanallarına müvəqqəti moratorium tətbiq edilməsini təklif edir. Təşkilat xarici sərhədlərin qorunmasının gücləndirilməsini, sürətli yoxlama və geri qaytarma prosedurlarının tətbiqini, eləcə də qanunsuz miqrantların sistemli və sürətləndirilmiş “remiqrasiyasını” nəzərdə tutur.

Lionda planlaşdırılan hər iki nümayişin qadağan edilməsi Fransada miqrasiya və siyasi radikallaşma ətrafında gərginliyin artdığı bir vaxtda ictimai asayiş məsələsinin yenidən gündəmə gəldiyini göstərir.