Macarıstan Milli Bankının (MNB) yeni araşdırmasına görə, illərdir davam edən yüksək inflyasiyaya və rəqəmsal ödənişlərin sürətli yayılmasına baxmayaraq, macarlar evdə xeyli miqdarda nağd pul saxlamaqda davam edir.

“İki sahil” xəbər verir ki, tədqiqatçılar bunun səbəbini gündəlik xərclərdə deyil, qeyri-müəyyən dövrlərdə maliyyə təhlükəsizliyi hissi əldə etmək istəyində görür.

2022–2025-ci illər arasında Macarıstanda inflyasiya rekord səviyyəyə çatsa da, əhalinin nağd pul ehtiyatları yalnız cüzi azalıb. Araşdırmaya görə, insanlar əvvəlcə gözlənilməz xərclər üçün ehtiyat pul saxlamağı üstün tutur, sonra isə uzunmüddətli məqsədlər üçün yığım edirlər. Sorğularda respondentlərin əksəriyyəti nağd pulu evdə saxlamağın səbəbi kimi bank sistemlərinə inam çatışmazlığını, iqtisadi qeyri-sabitliyi və böhran zamanı pula çıxışın çətinləşməsi qorxusunu göstərib.

Tədqiqatçılar bildirir ki, sadəcə maliyyə savadlılığını artırmaq kifayət deyil - bankların şəffaflığını və etibarlılığını yüksəltmək daha effektiv olardı.