İnsan həyatında elə günlər var ki, illər keçsə də öz dəyərini, mənasını və doğurduğu hissləri itirmir. Həmin günlərdən biri də məktəb həyatının son səhifəsinin çevrildiyi, uşaqlıq illərinin xatirəyə çevrildiyi, gələcəyə aparan yolların isə daha aydın göründüyü “Son zəng”in səsləndiyi gündür. Bu gün hər bir məzun üçün sadəcə təhsil mərhələsinin tamamlanması deyil, həm də yeni arzuların, yeni məqsədlərin və yeni ümidlərin başlanğıcıdır.

“İki sahil” xəbər verir ki, iyunun 13-də ölkənin bütün ümumtəhsil müəssisələrində olduğu kimi, Xətai rayonunda fəaliyyət göstərən Humanitar fənlər təmayüllü məktəb-liseydə də “Son zəng” tədbiri böyük təntənə, yüksək bayram əhval-ruhiyyəsi və kövrək duyğularla qeyd olunub.

Bayram münasibətilə xüsusi zövqlə bəzədilmiş məktəbin həyəti həmin gün bir başqa gözəlliyə bürünüb. Əllərində gül dəstələri tutmuş valideynlər, övladlarının uğurlarına sevinən müəllimlər, illərin dostluğunu və xatirələrini bölüşən məzunlar bu mənzərəyə xüsusi rəng qatıb. Hər kəsin baxışlarında sevinc, qürur, minnətdarlıq və ayrılıq hissləri oxunub. Məktəb divarları arasında keçən on bir ilin xatirələri sanki həmin gün bir daha canlanıb.

Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan məktəb-liseyin direktoru, Əməkdar müəllim Nəzakət Əsgərova məzunlara müraciət edərək bildirib ki, bugünkü gün məktəbin həyatında ən yaddaqalan və ən qürurverici günlərdən biridir.

O qeyd edib ki, on bir il əvvəl məktəbə ilk addımlarını atan uşaqlar bu gün savadlı, düşünən, müasir dünyagörüşə malik gənclər kimi yeni həyata qədəm qoyublar.

Direktor çıxışında vurğulayıb ki, məktəb yalnız dərs keçilən məkan deyil, həm də şəxsiyyət formalaşdıran müqəddəs bir ocaqdır. Bu illər ərzində şagirdlər burada bilik əldə etməklə yanaşı, dostluğun, vətənpərvərliyin, insanpərvərliyin, dürüstlüyün və zəhmətsevərliyin nə olduğunu öyrəniblər.

O, məzunlara gələcək həyat yollarında uğurlar arzulayaraq diqqətə çatdırıb ki, harada olmalarından asılı olmayaraq, onların hər birinin uğuru məktəbin uğuru kimi qiymətləndiriləcək.

Nəzakət Əsgərova çıxışında ölkəmizdə təhsilin inkişafına göstərilən dövlət qayğısından da bəhs edib. O, Ümummilli Lider Heydər Əliyevin təhsilə verdiyi böyük önəmi xatırladaraq, Prezident İlham Əliyevin rəhbərliyi altında bu siyasətin uğurla davam etdirildiyini, Birinci vitse-prezident Mehriban xanım Əliyevanın təhsil sahəsində həyata keçirdiyi mühüm layihələrin ölkəmizdə insan kapitalının inkişafına böyük töhfələr verdiyini diqqətə çatdırıb.

Xətai Rayon İcra Hakimiyyətinin başçısı Rafiq Quluyev məzunları, müəllimləri və valideynləri səmimi şəkildə təbrik edib. O bildirib ki, “Son zəng” hər bir gəncin həyatında unudulmaz və simvolik bir gündür — uşaqlıq və məktəb illərinin başa çatdığı, yeni həyat yolunun isə başladığı mühüm mərhələdir.

Rafiq Quluyev çıxışında Xətai rayonunda təhsil sahəsində görülən işlərə də toxunaraq bildirib ki, son illərdə məktəb infrastrukturunun yenilənməsi, təhsil şəraitinin yaxşılaşdırılması və gənclərin inkişafı üçün yaradılan imkanlar dövlətin bu sahəyə göstərdiyi diqqətin bariz nümunəsidir. O qeyd edib ki, bu şərait gənclərə daha yüksək nəticələr əldə etmək üçün geniş perspektivlər açıb.

O vurğulayıb ki, məktəb yalnız bilik verən bir məkan deyil, eyni zamanda gəncin xarakterinin formalaşdığı, sosial məsuliyyətin və vətənə bağlılığın aşılandığı mühüm həyat məktəbidir. Rafiq Quluyev qeyd edib ki, bu gün məzun olan hər bir gənc sabah cəmiyyətin müxtəlif sahələrində fəaliyyət göstərərək ölkənin sosial-iqtisadi inkişafında mühüm rol oynayacaq.

Çıxışında müəllim əməyinə xüsusi dəyər verən Rafiq Quluyev bildirib ki, müəllimlər gələcək nəsillərin formalaşmasında ən əsas dayaqlardan biridir və onların fədakarlığı hər zaman yüksək qiymətləndirilməlidir. O, eyni zamanda valideynlərin övladlarının təhsil yolunda göstərdiyi dəstəyi xüsusi vurğulayaraq onlara təşəkkür edib.

Rayon rəhbəri məzunlara müraciət edərək onları daim öz üzərlərində çalışmağa, elm və bilik əldə etməyə, müasir dünyagörüşünə sahib olmağa və milli dəyərlərə sadiq qalmağa çağırıb. O, gənclərin dövlətə sədaqət, vətənə xidmət və ictimai məsuliyyət hissi ilə yetişməsinin vacibliyini qeyd edib.

Milli Məclisin deputatı Zahid Oruc məzunları həyatlarının yeni və məsuliyyətli mərhələsinə qədəm qoymaları münasibətilə təbrik edib. O bildirib ki, bu gün gənclər üçün yalnız bir tədris ilinin sonu deyil, həm də böyük arzulara, hədəflərə və həyat məqsədlərinə açılan yeni bir yolun başlanğıcıdır.

Deputat qeyd edib ki, müasir dövr gənclərdən yalnız yüksək akademik bilik deyil, eyni zamanda geniş dünyagörüşü, analitik düşüncə, güclü vətəndaş mövqeyi və milli kimliyə bağlılıq tələb edir. O vurğulayıb ki, Azərbaycan gəncliyi ölkənin ən mühüm intellektual potensialıdır və gələcək inkişafın əsas dayaqlarından birini təşkil edir.

Zahid Oruc çıxışında gənclərə çağırış edərək bildirib ki, onlar əldə etdikləri bilik və bacarıqları şəxsi uğurlar üçün deyil, həm də cəmiyyətin və dövlətin inkişafı üçün istifadə etməlidirlər. O qeyd edib ki, hər bir məzun gələcəkdə Azərbaycanın müxtəlif sahələrində mühüm mövqelərə sahib olacaq və ölkənin beynəlxalq nüfuzunun güclənməsinə töhfə verəcək.

Sonda deputat məzunlara uğurlar arzulayaraq onların savadlı, məsuliyyətli və vətənə sadiq vətəndaşlar kimi yetişəcəklərinə inamını ifadə edib.

Yeni Azərbaycan Partiyası (YAP) Xətai rayon təşkilatının sədri Ramil Mirzəyev məzunları, müəllimləri və valideynləri təbrik edib. O bildirib ki, “Son zəng” məktəb illərinin yekunu olmaqla yanaşı, gənclərin həyatında yeni məsuliyyət və yeni hədəflərlə dolu bir mərhələnin başlanğıcıdır.

Ramil Mirzəyev vurğulayıb ki, məktəb dövrü gənclərin yalnız bilik qazandığı illər deyil, həm də onların xarakterinin formalaşdığı, həyat mövqeyinin və düşüncə tərzinin möhkəmləndiyi mühüm bir dövrdür. O qeyd edib ki, bu gün məzun olan hər bir gənc sabah ölkənin müxtəlif sahələrində fəaliyyət göstərərək Azərbaycanın inkişafına töhfə verəcək.

Sədr əlavə edib ki, müasir dövrdə gənclərdən təkcə savad deyil, eyni zamanda təşəbbüskarlıq, düzgün qərarvermə bacarığı, ictimai məsuliyyət və milli dəyərlərə bağlılıq tələb olunur. O, gəncləri daim öz üzərlərində çalışmağa, yeni biliklər qazanmağa və vətənə sadiq vətəndaşlar kimi formalaşmağa çağırıb.

YAP Xətai rayon təşkilatının sədri müəllimlərin və valideynlərin gənclərin yetişməsindəki rolunu xüsusi qeyd edərək onların zəhmətinin gələcək nəsillərin formalaşmasında mühüm yer tutduğunu bildirib.

Sonda Ramil Mirzəyev məzunlara uğurlar arzulayıb, onların Azərbaycanın gələcəyini formalaşdıracaq savadlı, məsuliyyətli və vətənpərvər gənclər kimi yetişəcəklərinə inamını ifadə edib.

Vətən Müharibəsi Qəhrəmanı, polkovnik-leytenant Ramiz Qasımovun həyat yoldaşı Günel Qasımova məzunları təbrik edərək onların həyatında yeni bir mərhələnin başlandığını bildirib.

Günel Qasımova çıxışında məzunlara gələcək həyat yollarında uğurlar arzulayıb, məktəb illərinin hər bir insanın həyatında ən dəyərli və unudulmaz dövr olduğunu vurğulayıb. O qeyd edib ki, bu gün əldə olunan bilik və tərbiyə gələcək uğurların əsas təməlidir.

O, xüsusilə vurğulayıb ki, bu gün məzun olan şagirdlər arasında onun qızı Gülay Qasımova da yer alıb. Günel Qasımova bildirib ki, Gülay Qasımovanın da bu mərhələni uğurla başa vurması həm ailə üçün qürurverici, həm də duyğulu bir an olub. O, bütün məzunlara valideynləri və müəllimləri tərəfindən göstərilən zəhməti unutmayaraq gələcəkdə məsuliyyətli və vətənə layiqli vətəndaşlar kimi yetişməyi tövsiyə edib.

Sonda Günel Qasımova şəhid ailəsi olaraq bütün şəhidlərin xatirəsinin daim uca tutulduğunu qeyd edib və Ramiz Qasımovun adının hər zaman qürurla xatırlandığını bildirib.

Şəhid Nicat Şükürlünün anası Yeganə Şükürlü qeyd edib ki, “Son zəng” hər bir gəncin həyatında uşaqlıq illərindən ayrılıb daha böyük məsuliyyətlərə doğru addım atdığı xüsusi bir mərhələdir. O, məzunlara arzu edib ki, əldə etdikləri bilikləri gələcək həyatlarında düzgün istiqamətdə istifadə etsinlər, daim çalışqan və məqsədyönlü olsunlar.

Şəhid anası vurğulayıb ki, bu gün azad və rahat şəkildə qeyd olunan hər bir tədbir, hər bir sevinc anı Vətən uğrunda canından keçən şəhidlərin fədakarlığı sayəsində mümkün olub. O bildirib ki, Nicat Şükürlü kimi qəhrəmanların xatirəsi gənclər üçün daim vətənə bağlılıq və məsuliyyət hissinin güclənməsinə səbəb olmalıdır.

Yeganə Şükürlü məzunlara müraciət edərək onları həyat yolunda düzgün seçimlər etməyə, milli dəyərlərə sadiq qalmağa və dövlətə layiqli vətəndaş kimi yetişməyə çağırıb. O, bütün məzunlara uğurlar arzulayıb və onların gələcəkdə ölkənin inkişafına töhfə verən gənclər olacağına inamını ifadə edib.

Sonda o, şəhidlərin xatirəsinin hər zaman uca tutulduğunu qeyd edib, Nicat Şükürlünün adının daim qürurla anıldığını bildirib.

Məzunlar adından çıxış edən Gülay Qasımlı bu günün onun və sinif yoldaşları üçün həm sevinc, həm də kövrək hisslərlə yadda qalan xüsusi bir gün olduğunu bildirib.

O qeyd edib ki, məktəb illəri hər bir gəncin həyatında ən yaddaqalan dövrlərdən biridir. Bu illər ərzində qazanılan biliklər, müəllimlərin əməyi və sinif yoldaşları ilə yaşanan xatirələr onların gələcək həyat yolunun əsasını təşkil edib.

Gülay Qasımlı çıxışında müəllimlərinə xüsusi təşəkkür edərək onların göstərdiyi səbir, diqqət və qayğının hər bir məzunun formalaşmasında böyük rol oynadığını vurğulayıb. O, valideynlərin də övladlarının təhsil yolunda daim dəstək olduğunu qeyd edib və onlara minnətdarlığını bildirib.

Məzunlar adından çıxış edən Gülay Qasımlı vurğulayıb ki, bu gün əldə etdikləri bilik və təcrübə onların gələcək uğurlarının təməlidir. O, bütün məzunlara yeni həyat mərhələsində uğurlar arzulayaraq, hər birinin ölkənin inkişafına töhfə verən savadlı və məsuliyyətli gənclər olacağına inamını ifadə edib.

Tədbirdə cari tədris ilində müxtəlif olimpiada, müsabiqə və layihələrdə uğur qazanan şagirdlərə fəxri fərmanlar və diplomlar təqdim olunub. Bu anlar iştirakçılar tərəfindən alqışlarla qarşılanıb və məktəbin uğur salnaməsinə yazılan növbəti nailiyyətlər kimi yadda qalıb.

Rəsmi hissədən sonra tədbir məzunların hazırladıqları maraqlı musiqi nömrələri, rəqslər və ədəbi-bədii kompozisiyalarla davam edib. Gənclərin təqdim etdikləri çıxışlar həm qonaqların, həm də müəllimlərin böyük marağına səbəb olub.

Ən təsirli məqamlardan biri isə məktəbin ənənəsinə uyğun olaraq “Bilik açarı”nın məzunlar tərəfindən onuncu sinif şagirdlərinə təqdim edilməsi olub. Bu rəmzi mərasim təhsil yolunun davamlılığını, bilik estafetinin nəsildən-nəslə ötürüldüyünü nümayiş etdirib.

Nəhayət, hamının səbirsizliklə gözlədiyi an yetişib. On bir ilin sevincini, həyəcanını, uğurlarını, xatirələrini və arzularını özündə yaşadan son zəng sədası məktəbin həyətində əks-səda verib. Bu səs uşaqlıq illəri ilə vidanın, böyük həyata atılan ilk addımın, gələcəyə açılan yeni üfüqlərin sədası olub.

Məzunlar gözlərində sevinc və kövrəkliklə müəllimləri və məktəbləri ilə vidalaşıb, valideynlər isə övladlarının böyüdüyünü və həyatın yeni mərhələsinə qədəm qoyduğunu qürur hissi ilə izləyiblər.

Beləliklə, Humanitar fənlər təmayüllü məktəb-liseydə keçirilən “Son zəng” tədbiri bir daha göstərib ki, məktəb yalnız bilik məkanı deyil, həm də xatirələrin, dostluqların, arzuların və gələcəyə inamın ünvanıdır. Bu gün məktəbdən ayrılan məzunlar üçün son zəng bir vida deyil, böyük arzulara, yeni uğurlara və işıqlı gələcəyə açılan ilk qapı olub.

Müəllimlər, məzunlar və valideynlər öz təəssüratlarını “İki sahil” in mikrafonuna  bölüşərək bu günün onlar üçün yaratdığı duyğuları ifadə ediblər. İndi isə həmin müsahibələrə keçid edirik.Liseyin riyaziyyat müəllimi Rəmziyyə Aslanova bu günün həm müəllimlər, həm də məzunlar üçün xüsusi əhəmiyyət daşıdığını qeyd edib:”“Son zəng” sadəcə bir tədbir deyil, illərlə davam edən zəhmətin, müəllim–şagird münasibətlərinin və tədris prosesində çəkilən əziyyətin nəticəsinin simvolik şəkildə yekunlaşdığı mühüm bir gündür. Onun sözlərinə görə, bu gün məktəb həyatının ən yaddaqalan anlarından biri kimi yadda qalır”.Müəllim bildirib ki, hər bir məzunun uğuru onun üçün ayrıca sevinc mənbəyidir və bu gün onların həyatında yeni bir mərhələnin başlanğıcıdır. O, şagirdlərə gələcək həyatlarında daha məsuliyyətli, çalışqan və məqsədyönlü olmalarını arzulayıb.

Liseyin Azərbaycan dili və ədəbiyyat müəllimi Uluz Əliyeva bu günün yalnız təqvimdə bir tarix deyil, həm də illərlə davam edən təhsil yolunun, mənəvi zəhmətin və formalaşan şəxsiyyətlərin yekun mənzərəsi olduğunu vurğulayıb.Uluz Əliyeva bildirib ki, “Son zəng” məktəb həyatının simvolik zirvəsidir və bu gün təkcə məzunlar üçün deyil, onları yetişdirən müəllimlər üçün də xüsusi emosional məna daşıyır. Onun sözlərinə görə, hər bir şagirdin uğuru sinif otaqlarında keçən illərin, çəkilən zəhmətin və paylaşılan biliklərin real nəticəsidir.Müəllim qeyd edib ki, Azərbaycan dili və ədəbiyyat fənni yalnız qrammatika və qaydalardan ibarət deyil, həm də düşünmə tərzinin, milli-mənəvi dəyərlərin və sözə həssas münasibətin formalaşmasında mühüm rol oynayır. O, şagirdlərin ədəbiyyat vasitəsilə həm özlərini, həm də dünyanı daha dərindən dərk etdiklərini diqqətə çatdırıb.Uluz Əliyeva əlavə edib ki, müəllimlik daim yenilənmə, özünü inkişaf etdirmə və məsuliyyət tələb edən bir peşədir. Onun fikrincə, hər bir dərs təkcə bilik ötürmək deyil, həm də şəxsiyyət formalaşdırmaq missiyası daşıyır.Sonda müəllim bütün məzunları təbrik edərək onlara gələcək həyat yollarında uğurlar, əzmkarlıq və düzgün seçimlər arzulayıb.

Valideyn Ellada Məmmədova çıxışı zamanı bu günün hər bir ailə üçün xüsusi və unudulmaz an olduğunu bildirib. O qeyd edib ki, illərlə davam edən məktəb həyatı təkcə təhsil deyil, həm də övladların şəxsiyyət kimi formalaşdığı, məsuliyyət və həyat dərsləri qazandığı bir dövrdür. Ellada Məmmədova müəllimlərin zəhmətini yüksək qiymətləndirərək, onların bu yolda göstərdiyi əməyi xüsusi minnətdarlıqla vurğulayıb.

Digər valideyn Mustafazadə Pərvanə isə çıxışında “Son zəng”in həm sevinc, həm də kövrək hisslər doğurduğunu qeyd edib. O bildirib ki, bu gün valideynlər üçün övladlarının böyüyərək yeni bir mərhələyə qədəm qoyması qürurverici olduğu qədər də duyğusal bir andır. Pərvanə Mustafazadə məktəb rəhbərliyinə və müəllim kollektivinə göstərdikləri diqqət və qayğıya görə təşəkkürünü ifadə edib.

Məzun Xammədova Zəhra çıxışında qeyd edib ki, məktəb illəri onun həyatında yalnız təhsil mərhələsi deyil, həm də xarakterin formalaşdığı, dostluqların və xatirələrin möhkəmləndiyi ən dəyərli dövr kimi yadda qalacaq. O bildirib ki, bu gün əldə olunan hər bir uğurun arxasında müəllimlərin əvəzsiz zəhməti, valideynlərin dəstəyi və illərlə davam edən əzmkarlıq dayanır. Zəhra Xammədova vurğulayıb ki, “Son zəng” bir son deyil, əksinə, yeni başlanğıcların qapısını açan mühüm bir mərhələdir.

Digər məzun Nadir Nadirov isə çıxışında bu günün həm qürur, həm də kövrək hisslərlə dolu olduğunu deyib. O qeyd edib ki, məktəb illəri onlara yalnız bilik deyil, eyni zamanda həyat dərsləri, məsuliyyət hissi və düzgün yol seçmək bacarığı qazandırıb. Nadir Nadirov müəllimlərinə göstərdikləri səbir, qayğı və istiqamət üçün xüsusi təşəkkürünü ifadə edib.Sonda hər iki məzun gələcək həyat yolunda bütün sinif yoldaşlarına uğurlar arzulayaraq, məktəb illərinin yaddaşlarda daim xoş xatirə kimi qalacağını bildiriblər.

Yaqut Ağaşahqızı, “İki sahil”