Böyük Britaniyada monarxın rəsmi ad günü münasibətilə keçirilən ənənəvi “Trooping the Colour” mərasimi bu il də təntənəli şəkildə təşkil olunub.

“İki sahil” xəbər verir ki, tədbir Kral III Çarlz, Kraliça Kamilla və kral ailəsinin digər üzvlərinin iştirakı ilə başlayıb. Taxtın varisi Uels şahzadəsi Uilyam, Edinburq hersoqu Şahzadə Eduard və Şahzadə Anna mərasimdə at belində iştirak ediblər.

Bukinqem Sarayından At Mühafizəçilərinin parad meydanına qədər davam edən təntənəli yürüşdə 1400-dən çox hərbçi, 200-ə yaxın at və yüzlərlə hərbi musiqiçi iştirak edib.

Mərasimin sonrakı mərhələsində Britaniya Kral Hərbi Hava Qüvvələrinin (RAF) “Red Arrows” akrobatika qrupu paytaxt səmasında ənənəvi aviaşou nümayiş etdirəcək. Tədbirin sonunda Kral III Çarlz və Kraliça Kamilla, həmçinin Uels şahzadəsi Uilyam və Uels şahzadəsi Ketrin övladları ilə birlikdə Bukinqem Sarayının balkonuna çıxaraq mərasimi izləyənləri salamlayacaqlar.

Qeyd edək ki, Böyük Britaniyada monarxın doğum günü hər il iyun ayında keçirilən “Trooping the Colour” mərasimi ilə qeyd olunur. Kral III Çarlz 14 noyabr 1948-ci ildə anadan olub.