İran tərəfindən həyata keçirilən pilotsuz uçuş aparatları və raket hücumu nəticəsində Küveytdə azı 63 nəfər yaralanıb. Məlumata görə, xəsarət alanlar arasında Küveyt  hava limanının əməkdaşları və sərnişinlər də var. Hadisə nəticəsində ən azı bir nəfərin həlak olduğu bildirilir.

“İki sahil” xəbər verir ki,  Küveyt Səhiyyə Nazirliyinin açıqlamasına əsasən, hadisə yerinə 25 təcili tibbi yardım briqadası göndərilib. Yaralılar arasında sınıqlar, baş nahiyəsindən zədələr və digər ağır travmalar alan şəxslər var. Bəzi hallarda ətrafların amputasiyası zəruri olub, yeddi nəfər isə cərrahi əməliyyat keçirib. Xarici turistlərin zərərçəkənlər arasında olub-olmaması barədə hələlik məlumat verilməyib.

Hücum nəticəsində hava limanının əsas terminalına ciddi ziyan dəyib, bəzi reyslər alternativ hava limanlarına yönləndirilib və hava nəqliyyatında fasilələr yaranıb. Daha sonra uçuşların bir hissəsi mərhələli şəkildə bərpa olunub.

Məlumata görə, İran eyni gecə ABŞ qüvvələrinin yerləşdiyi obyektləri hədəf alaraq Küveyt və Bahreyn istiqamətində də hücumlar həyata keçirib. Bəhreynə yönələn bəzi raketlərin ABŞ və Bəhreyn qüvvələri tərəfindən zərərsizləşdirildiyi bildirilir.