Mayın 9-da Yeni Azərbaycan Partiyası (YAP) Zəngilan rayon təşkilatının və Zəngilan Rayon İcra Hakimiyyətinin birgə təşkilatçılığı ilə xalqımızın Ümummilli Lideri Heydər Əliyevin anadan olmasının 103-cü ildönümünə həsr olunmuş “Ulu Öndər Heydər Əliyevin irsi milli sərvətimizdir” mövzusunda  tədbir keçirilib.

“İki sahil” xəbər verir ki, tədbir iştirakçıları əvvəlcə Ulu Öndər Heydər Əliyevin büstü önünə gül dəstələri düzərək, dahi şəxsiyyətin əziz xatirəsini dərin hörmət və ehtiramla yad ediblər.

Rayon Mədəniyyət evində təşkil olunan tədbirdə Ümummilli Liderin və Azərbaycanın ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Zəngilan Rayon İcra Hakimiyyətinin başçısı Ramiz Həsənov çıxış edərək Ümummilli Lider Heydər Əliyevin çoxşaxəli siyasi fəaliyyətindən və dövlətçiliyimizin möhkəmləndirilməsindəki tarixi xidmətlərindən bəhs edib. O bildirib ki, Heydər Əliyevin fəaliyyəti siyasi müdriklik, uzaqgörənlik və xalqa sədaqət nümunəsidir. Bu gün müstəqil Azərbaycanın uğurlarının təməlində Ulu Öndərin uzaqgörən siyasəti dayanır və bu kurs  Cənab Prezident İlham Əliyev tərəfindən uğurla davam etdirilir.

YAP Zəngilan rayon təşkilatının sədri Natiq Quluzadə qeyd edib ki, Azərbaycanın qazandığı bütün nailiyyətlər Heydər Əliyev dühasının bəhrəsidir. O, dahi rəhbərin dövlət quruculuğu sahəsindəki xidmətlərini vurğulayaraq, Yeni Azərbaycan Partiyasının ölkəmizin aparıcı siyasi qüvvəsi olduğunu və Ümummilli Liderin irsinin gənclər üçün hər zaman örnək qalacağını diqqətə çatdırıb.

Qeyd olunub ki, bu gün möhtərəm Prezident İlham Əliyevin rəhbərliyi ilə Ümummilli Liderin siyasi kursu ölkəmizdə uğurla davam etdirilir. Məhz bu uzaqgörən siyasət nəticəsində Azərbaycan davamlı inkişaf və tərəqqi yolunda inamla irəliləyir, öz qüdrətini hər ötən gün daha da möhkəmləndirir.

Milli Məclisin deputatı İmamverdi İsmayılov Ulu Öndərin milli-mənəvi dəyərlərin qorunması və azərbaycançılıq ideologiyasının formalaşdırılması sahəsindəki müstəsna xidmətlərindən danışıb. Vurğulanıb ki, Prezident İlham Əliyevin qətiyyətli rəhbərliyi ilə əldə olunan tarixi Zəfər Heydər Əliyev ideyalarının təntənəsidir.

Tədbirdə çıxış edən veteran partiya üzvü Almas Orucova Ümummilli Liderin dövlətçilik ənənələrinin möhkəmləndirilməsindəki rolundan bəhs edib.

Vurğulayıb ki, məhz Ulu Öndərin xilaskarlıq missiyası sayəsində Azərbaycan dərin siyasi böhrandan qurtulub, ölkədə davamlı sabitlik və tərəqqi dövrü başlayıb.

Çıxışlardan sonra yeni üzvlərə partiya vəsiqələri, rayonun ictimai-siyasi həyatında fəallıq göstərən üzvlərə isə fəxri fərmanlar təqdim olunub.

Daha sonra Ulu Öndərin həyat və fəaliyyətinə həsr olunmuş videoçarx nümayiş etdirilib.

Sonda Yeni Azərbaycan Partiyasının Himni səsləndirilib.