İsrailin xarici işlər naziri Gideon Saar Belçika rəhbərliyini yəhudiləri təqib etmək üçün cinayət qanunundan istifadə etməkdə günahlandırıb.

“İki sahil” xəbər verir ki, bu barədə RİA Novosti məlumat yayıb.

Gideon Saar bildirib ki, Belçikada yəhudi dini ayini ilə məşğul olan şəxslərə qarşı cinayət işi qaldırılması narahatlıq doğurur.

Onun sözlərinə görə, sözügedən məsələ Antverpen şəhərində 2025-ci ildə aparılan araşdırmalarla bağlıdır. Həmin araşdırmalar çərçivəsində bəzi şəxslər tibbi lisenziya olmadan fəaliyyət göstərməkdə ittiham olunublar. İsrail tərəfi isə bunu dini azadlıqlara müdaxilə kimi qiymətləndirir.

Gideon Saar qeyd edib ki, bu addım Belçikanı dini inancların icrasına görə yəhudilərə qarşı cinayət hüququndan istifadə edən ölkələr sırasına daxil edir və bu, qəbuledilməzdir. O, bəyanatında İrlandiya-nı da oxşar yanaşma sərgiləyən ölkələrdən biri kimi qeyd edib.

Digər tərəfdən, Belçika rəsmiləri məsələyə daha çox hüquqi aspektdən yanaşaraq, tibbi fəaliyyətin lisenziyalaşdırılması qaydalarının pozulması ilə bağlı araşdırmaların aparıldığını bildirirlər. Bu isə məsələni dini azadlıq və hüquqi tənzimləmə arasında balans mövzusu kimi gündəmə gətirir.