Prezident İlham Əliyevin rəhbərliyi ilə Azərbaycan bu gün qlobal miqyasda etibarlı tərəfdaş, regionun isə əsas iqtisadi-siyasi aktoru kimi qəbul edilir. 2026-cı il aprelin 27-də Çex Respublikasının Baş naziri Andrey Babişin ölkəmizə rəsmi səfəri və dövlət başçımızın mətbuata verdiyi bəyanat iki ölkə arasındakı münasibətlərin keyfiyyətcə yeni müstəviyə keçdiyinin bariz göstəricisidir. Bu səfər təkcə diplomatik protokol deyil, həm də konkret iqtisadi və strateji hədəflərə yönəlmiş mühüm bir addımdır.
Cənab Prezidentin qeyd etdiyi kimi, Azərbaycan və Çexiya arasında hazırda çox fəal siyasi dialoq mövcuddur. İki liderin ilk görüşünün yüksək məhsuldarlıqla keçməsi və həm regional, həm də qlobal məsələlər ətrafında fikir mübadiləsinin aparılması göstərir ki, tərəflər arasında qarşılıqlı etimad ən yüksək səviyyədədir. Baş nazirin rəsmi səfəri bu dinamikanın məntiqi nəticəsidir və gələcək əməkdaşlığın “yol xəritəsi” rolunu oynayır.
Səfər zamanı regional, ikitərəfli və qlobal xarakter daşıyan məsələlər ətrafında aparılan fikir mübadiləsi isə konkret və nəticəyönümlü olmaqla, gələcək fəaliyyətin prinsiplərini, iqtisadi sahədə görüləcək işlərin yeni prioritetlərini müəyyən edir.
İki ölkə arasındakı ticarət dövriyyəsinin 800 milyon dolları ötməsi ciddi nailiyyətdir. Lakin Prezident İlham Əliyev hər zaman olduğu kimi, kəmiyyət göstəriciləri ilə yanaşı, keyfiyyət dəyişikliklərinə də xüsusi diqqət çəkir. Hazırkı dövriyyənin əsasını neft ixracı təşkil etsə də, dövlət başçımız ticarət balansının tarazlaşdırılmasını və qeyri-neft sektorunun payının artırılmasını prioritet vəzifə kimi qarşıya qoyub. Çexiyadan gələn böyük iş adamları qrupunun iştirakı ilə keçirilən biznes-forum bu istiqamətdə mühüm platformadır. Bu, yeni sərmayə layihələrinin və birgə müəssisələrin yaradılması üçün əlverişli zəmin formalaşdırır.
Energetika sahəsi ənənəvi olaraq əməkdaşlığımızın sütununu təşkil edir. Azərbaycan nefti Çexiyanın enerji balansında mühüm yer tutur. Bu gün Azərbaycan qazının 16 ölkəyə ixrac edilməsi və onlardan 10-nun Avropa İttifaqı üzvü olması ölkəmizin qitənin enerji təhlükəsizliyindəki əvəzedilməz rolunu bir daha təsdiqləyir. Prezidentin vurğuladığı kimi, biz bu əməkdaşlığa sadəcə alış-veriş deyil, uzunmüddətli və strateji tərəfdaşlıq prizmasından yanaşırıq.
Səfərin ən diqqətçəkən məqamlarından biri müdafiə sənayesi sahəsindəki müzakirələrdir. Çexiyanın bu sahədəki zəngin təcrübəsi ilə Azərbaycanın artan yerli istehsal potensialının birləşdirilməsi strateji əhəmiyyət kəsb edir. Artıq sadəcə məhsul alışı deyil, konkret birgə istehsal layihələri üzərində danışıqların getməsi ölkəmizin hərbi-sənaye kompleksinin gücləndirilməsi baxımından inqilabi addımdır.
Prezident İlham Əliyevin bəyanatı bir daha sübut etdi ki, Azərbaycanla Çexiya arasındakı dostluq münasibətləri möhkəm təməllər üzərində qurulub. Hökumətlərarası Komissiyanın qarşıdakı fəaliyyəti və planlaşdırılan layihələr bu dostluğun iqtisadi dividendlərə çevrilməsini təmin edəcək. Biz, parlamentarilər olaraq, bu strateji kursu dəstəkləyir və əminik ki, Azərbaycanın beynəlxalq nüfuzu və iqtisadi qüdrəti bu cür qarşılıqlı faydalı tərəfdaşlıqlar sayəsində daha da artacaqdır.
Anar Məmmədov,
Milli Məclisin deputatı
