Rənglərin insan psixologiyasına təsiri ilə bağlı aparılan yeni araşdırmalar gündəlik seçimlərimizin düşündüyümüzdən daha çox məna daşıya biləcəyini ortaya qoyur. Belə ki, insanların üstünlük verdiyi rənglər onların emosional vəziyyəti və davranış meyilləri ilə müəyyən dərəcədə əlaqəli olduğu düşünülür.

Psixologiya sahəsində aparılan genişmiqyaslı tədqiqatlar göstərir ki, rənglər insanın ruh halına və qərarvermə prosesinə təsir edə bilir. 130-dan çox elmi işi əhatə edən sistematik araşdırmada müəyyən rənglər ilə emosional reaksiyalar arasında sabit əlaqələr olduğu qeyd edilib.

Araşdırmalara əsasən, sarı rəng daha çox enerji və pozitiv hisslərlə, mavi və yaşıl isə sakitlik və balansla əlaqələndirilir. Son illərdə aparılan tədqiqatlar isə insanların xarakter xüsusiyyətlərinin onların rəng seçimlərinə təsir etdiyini göstərir.

Mavi rəng daha çox etibar və sabitliklə əlaqələndirilir. Bu rəngi sevən insanların sakit və güvənilən xarakterə malik olduğu qeyd olunur. Yaşıl rəng harmoniya və inkişafı simvolizə edir. Bu rəngi seçənlərin daha uyğunlaşan və açıq fikirli olduğu bildirilir. Qırmızı rəng enerji və güc rəmzi sayılır. Bu rəngi sevənlər isə daha aktiv və cəsarətli olurlar. Sarı rəng optimizm və yaradıcılıqla əlaqələndirilir. Bənövşəyi rəng isə daha çox fərdilik və emosional dərinliklə seçilən insanları xarakterizə edir. Qara rəng güc və nəzarət hissi ilə, ağ rəng isə sadəlik və nizamla əlaqələndirilir.

Rəng seçiminin insan xarakterini tam şəkildə müəyyən etmədiyini bildirən mütəxəssislər vurğulayırlar ki, bu, emosional meyillər və psixoloji xüsusiyyətlər barədə müəyyən ipucları verə bilər.

Şahnigar Əhmədova, “İki sahil”