Canni İnfantino FIFA prezidenti seçilməsinin 10-cu ildönümündə üzv assosiasiyaların prezidentlərinə məktub yazaraq onlara dəstəklərinə və dünyanın ən populyar idman növünün idarə olunmasında köməyə görə təşəkkür edib.

“İki sahil” xəbər verir ki, 2016-cı il fevralın 26-da İsveçrənin Sürix şəhərində keçirilən Fövqəladə Konqresdə prezident seçilməsindən bəri 11 əsas nailiyyəti sadalayan İnfantino deyib: “İnanıram ki, futbolu FIFA-ya, FIFA-nı isə futbola uğurla qaytardıq. Biz bunu birlikdə etdik”.

İnfantino xatırladıb ki, seçildiyi zaman FIFA öz mövcudluğunu təhlükə altına alan bir böhranla üzləşib və ona səs verməklə FIFA Konqresi “islahat, şəffaflıq və inkişafa əsaslanan” yeni bir yol seçib.

O, FIFA ilə milli assosiasiyalar arasında birliyin futbolun transformasiyasında açar olduğunu vurğulayıb. “Buna görə də, böyük birlik hissi ilə işiniz, sədaqətiniz və əlbəttə ki, bunun mümkün olmasında göstərdiyiniz sarsılmaz dəstəyiniz və son 10 ildə FIFA-nı futbola qaytarmaqda rolunuz üçün dərin təşəkkürümü bildirmək istəyirəm”, - deyə o bildirib.

Vurğulanan əsas tədbirlər arasında 2016-cı ildə başlanan və milli assosiasiyalara inkişaf maliyyələşdirməsini yeddi dəfə artıran və onlara yerli investisiyalar yönəltməyə imkan verən FIFA-nın İnkişaf Proqramı da var.

FIFA, həmçinin maliyyə vəziyyətindən asılı olmayaraq, dünya miqyasında gənc oyunçulara strukturlaşdırılmış yollara çıxış imkanı təmin etməyi hədəfləyən İstedadın İnkişafı Sxemi vasitəsilə gənclərin inkişafını genişləndirib. İnzibati potensialın artırılması proqramları hüquqi, maliyyə, infrastruktur, tibbi, İT, mühafizə və təhlükəsizlik kimi sahələri əhatə edib.

2018-ci ildə hazırda 83 milli assosiasiyada tətbiq olunan Video Köməkçi Hakim (VAR) sisteminin tətbiqi sayəsində matçlarda daha çox ədalət təmin edilib. FIFA bu üstünlükləri, ilk növbədə, “VAR Light”ın inkişafı və daha yaxınlarda Futbol Video Dəstəyinin tətbiqi yolu ilə daha da demokratikləşdirməyə çalışıb.

Bundan əlavə, 2024-cü ildə FIFA bütün milli assosiasiyaların yekdil dəstəyi ilə irqçiliyə qarşı qlobal mübarizə kampaniyasını elan edib.

FIFA, həmçinin Dünya Kubokunun 48 komandaya genişləndirilməsi ilə kişilərdən ibarət milli komandalar üçün daha çox oyun imkanı yaradıb. Eynilə, FIFA Qadınlar Dünya Kuboku 2023-cü il üçün 32 komandaya, 2031-ci ildən etibarən isə 48 komandaya qədər genişləndirilib. Belə ki, 204 milli assosiasiyada 1700-dən çox qadın üçün inkişaf layihəsi həyata keçirilib.

Klub futbolunda FIFA 2025-ci ildə ilk genişləndirilmiş Klublararası Dünya Kubokunu təşkil edib və 2028-ci ildə qadınlar arasında klublararası Dünya Kubokunu, üstəgəl illik FIFA Qitələrarası Kubokunu və qadınlar arasında Çempionlar Kubokunu başlatmağı planlaşdırır.