Biz BMT qurumlarından səsimizə səs vermələrini istəyirik. Bu gün burada təkcə öz itkin ailə üzvlərimiz üçün deyil, dörd minədək itkin şəxsin ailəsi adından iştirak edirik. Ümid edirik ki, itkin düşən Azərbaycan vətəndaşları barədə tezliklə məlumat ala biləcəyik, çünki itkin yolu gözləmək çox ağırdır.
“İki sahil” xəbər verir ki, bu sözləri Xocalı soyqırımında itkin düşmüş Oqtay Məmmədovun həyat yoldaşı Pərvanə Məmmədova Beynəlxalq İtkin Düşmüşlər Günündə “Qarabağ İtkin Ailələri” İctimai Birliyi tərəfindən Cenevrədə BMT bölməsinin qarşısında təşkil edilmiş aksiyada bildirib. O qeyd edib ki, ömrünün 35-ci baharında itkin düşən həyat yoldaşının yoxluğu ilə indiyədək ailəlikcə barışa bilmir, bu yara qaysaq bağlamır. Hər dəfə Xocalıya gedəndə ötən günləri ağrı-acı ilə yada salan P. Məmmədova üçün qaynı Vaqif Məmmədovun bütün ailə üzvləri ilə itkin düşməsi əsl insanlıq faciəsidir. Vaqiflə birlikdə onun 14, 16 və 18 yaşlı övladları və həyat yoldaşı itkin düşüb, bir ailə bütövlükdə yer üzündən silinib.
1992-ci ildə Fərrux dağı uğrunda gedən döyüşlərdə itkin düşmüş İlham Dadaşovun anası Elmira Dadaşova isə bildirib ki, bu aksiya vasitəsilə beynəlxalq ictimaiyyətin Ermənistan hökumətindən minalanmış ərazilərin düzgün xəritəsini tələb etməyə çağırırlar.
“İtkin ailəsi kimi yaşamaq çox çətindir. Hər dəfə qapı gözlənilməz döyüləndə və ya zəng gələndə təşvişlə bir-birimizin üzünə baxırıq ki, görəsən kimdir, nə xəbər alacayıq?”, - deyən itkin Şahin Əliyevin anası Mahuru Şahin Cenevrədə beynəlxalq təşkilatlardan Ermənistan xalqı və hökumətinə minalanmış ərazilərin xəritəsinin verilməsi üçün təzyiq göstərilməsini istədiklərini bildirib. O, diqqətə çatdırıb ki, Qarabağda kütləvi məzarlıq çoxdur, lakin ərazinin böyük hissəsi minalanıb. Düzgün xəritələr vasitəsilə itkin düşmüş şəxslərin aqibətinə aydınlıq gələ, onların ailələrinin gözü yollardan çəkilə bilər.
İtkin Səxavət Canıyevin həyat yoldaşı Reyhan Canıyeva da Cenevrəyə gəlməkdə məqsədlərinin beynəlxalq ictimaiyyəti Ermənistana təzyiq göstərməyə çağırmaq olduğunu bildirib. Dörd minədək azərbaycanlı itkin şəxsin sonrakı taleyinə aydınlıq gətirilməsi və kütləvi məzarlıqların xəritəsinin verilməsi bu istiqamətdə əsas tələbdir.
