Venesuela xam neftini daşıyan ABŞ neft nəhəngi “Chevron” şirkəti tərəfindən icarəyə götürülmüş iki tanker cümə axşamı ABŞ sularına çatıb və bu, Vaşinqton tərəfindən verilən yeni lisenziyadan sonra Cənubi Amerika ölkəsi neftinin ABŞ-a ilk idxalını qeyd edib.

 Xatırladaq ki, ABŞ Maliyyə Nazirliyi keçən ay “Chevron”a ABŞ şirkətinə OPEC ölkəsində fəaliyyət göstərməyə və sanksiyalara məruz qalan Venesuelaya qarşı daha sərt siyasətlərin səbəb olduğu üç aylıq fasilədən sonra öz neftini ixrac etməyə icazə verən məhdud lisenziya verib.

“LSEG” məlumatlarına və dövlət şirkətinin sənədlərinə əsasən, “Chevron”un bir neçə birgə müəssisədə tərəfdaşı olan “PDVSA” ilə danışıqlarından sonra bu ayın əvvəlində Venesuela nefti ilə yüklənmiş tankerlər ABŞ-a çatıb.

Cari ilin birinci rübündə ABŞ-a gündə təxminən 252000 barrel Venesuela nefti ixrac edən “Chevron” adətən, xam neftin bir hissəsini öz neft emalı zavodlarında emal edir, qalan hissəsini isə ABŞ-ın “Valero Energy” və “PBF Energy” şirkətləri də daxil olmaqla, müstəqil emalçılara satır.

Qeyd edək ki, Venesuela hökuməti ABŞ-ın sanksiyalarını rədd edir və bunu xalqa qarşı iqtisadi müharibə hesab edir.

Nubar Süleymanova, “İki sahil”