Avqustun 15-dən etibarən 2023-cü ildən ABŞ-a gələn on minlərlə ukraynalı, ABŞ hakimiyyəti mövcud qaydalara dəyişiklik etməsə, qaçqın statusunu itirməyə başlayacaq. Ümumilikdə bu, yaxın aylarda təxminən 120 min ukraynalıya təsir edə bilər.

“İki sahil” xəbər verir ki,  bu barədə "The Wall Street Journal" yazır.

2022-ci ildə ABŞ-ın o zamankı prezidenti Co Baydenin administrasiyası “Ukrayna naminə birləşmə” (U4U) proqramını işə salıb. Ona əsasən, ukraynalılar ölkədə onlara maliyyə yardımı göstərə biləcək şəxs olarsa, ABŞ-da iki ilə qədər qala bilərdilər. Müddət bitdikdən sonra icazə yenilənə bilər. Bu proqram çərçivəsində ümumilikdə 240 min Ukrayna vətəndaşının ABŞ-a daxil olduğu bildirilir.

Yanvar ayında vəzifəyə gəldikdən sonra Donald Tramp bir çox digər qaçqın proqramları kimi U4U-nu dayandırıb.

WSJ-nin qeyd etdiyi kimi, 2023-cü il avqustun 16-dan əvvəl ABŞ-a daxil olan ukraynalılar artıq başqa proqramla qorunur. Bundan sonra daxil olanların ABŞ-da qalma müddəti tədricən başa çatacaq, beləliklə, onlar qanunsuz mühacir kimi həbs oluna və deportasiya oluna bilərlər.