Moskvaya qarşı yeni sanksiyalar haqqında qanun layihəsinin müəllifləri olan amerikalı senatorlar hesab edirlər ki, ABŞ prezidenti Donald Tramp dondurulmuş Rusiya aktivlərindən Ukraynaya kömək etmək üçün istifadə edə bilər.

“İki sahil” xəbər verir ki, bu barədə senator Lindsi Grem CBS televiziyasına müsahibəsində deyib.

“Mən prezidenti qabaqlamaq istəmirəm, amma dondurulmuş aktivlərlə bağlı xəbərləri izləyin. Avropalılar bu aktivlərdən əldə olunan gəlirləri Ukraynaya köçürməklə kifayətlənmək istəyirlər. ABŞ-nin maliyyə naziri Skott Bessent daha da irəli getmək istəyir. Dondurulmuş aktivlərə qarşı daha aqressiv tədbirlər görmək planları ilə bağlı xəbərləri izləyin”, - deyə o bildirib.

Senator Riçard Blyumental öz növbəsində əlavə edib ki, avropalılar Rusiyanın dondurulmuş aktivlərinə çıxış əldə edə bilərlər: “Onlar bu aktivlərin ən azı bir hissəsi ilə, əldə etdikləri milyardlarla dollar gəlirlə məşğul olmaq üçün planlar hazırlayırlar. ABŞ-də dondurulmuş Rusiya aktivlərinin 5 milyard dolları da istifadə oluna bilər”.