Malayziyanın “Petronas” dövlət enerji şirkəti və tərəfdaşları “XRG” “Hazarnebit” dövlət müəssisəsi və “Türkmənnebit” dövlət konserni ilə birlikdə Xəzər dənizində qaz və kondensatla zəngin “I Blok” konsessiyası üçün yeni hasilatın pay bölgüsü müqaviləsi imzalamaqla Türkmənistanın enerji sektorunda uzunmüddətli iştirakını gücləndirib.

Razılaşmaya, həmçinin “Türkmənqaz” dövlət konserni ilə uzunmüddətli qaz satışı sazişi daxildir ki, bu da konsorsiumun Türkmənistanın enerji təhlükəsizliyi məqsədlərinə və təbii qaz ixracını diversifikasiya etmək ambisiyalarına dəstək vermək öhdəliyini möhkəmləndirir. Yeni müqavilənin şərtlərinə əsasən, Petronas 57% iştirak payı ilə operatorluğu saxlayacaq.

Onun konsorsium tərəfdaşları “XRG” 38%, “Hazarnebit” isə 5% paya sahib olacaq.

Hazırda sutkada təqribən 400 milyon kubfut təbii qaz hasil edən blokda 7 trilyon kubfutdan çox çıxarıla bilən qaz ehtiyatı olduğu təxmin edilir.

Blok əhəmiyyətli uzunmüddətli inkişaf potensialına malikdir və artan regional və qlobal tələbi ödəmək üçün genişləndirilmiş istehsal gücü var.

“Petronas”ın icraçı vitse-prezidenti və hasilat üzrə baş direktoru Jukris Abdul Vahab razılaşmanın Malayziyanın enerji nəhənginin ölkədəki qalıcı rolunu bir daha təsdiq etdiyini söyləyib.

“Təxminən otuz il bundan əvvəl qoşulduğumuz Türkmənistanın enerji sektorunda ilk beynəlxalq operator kimi bu mərhələ bizim mövcudluğumuzu gücləndirir və sektorda davamlı genişlənməmizi göstərir.Biz ölkənin enerji sənayesinin davamlı inkişafına töhfə verməkdən şərəf duyuruq və “XRG”, “Hazarnebit”, “Türkmənnebit” və “Türkmənqaz” şirkətləri ilə uzunmüddətli tərəfdaşlığı inkişaf etdirməyə sadiqik”,-deyə o bildirib.

Qeyd edək ki, bu son razılaşma qrupun beynəlxalq qaz portfelinin gücləndirilməsi strategiyasını vurğulayır, eyni zamanda ev sahibi ölkələrə uzunmüddətli enerji keçidi və iqtisadi inkişaf məqsədlərinə nail olmaqda dəstək verir.

Nubar Süleymanova, “İki sahil”