Dörd il  öncə  Müzəffər Ali Baş Komandan İlham Əliyevin rəhbərliyi ilə Azərbaycan Ordusu yazdığı tarixlə xalqımızın səbirsizliklə gözlədiyi bu günləri bəxş etdi. Artıq torpaqlarımızın işğaldan azad olunduğu tarixləri böyük qürur hissi ilə qeyd edirik.

Dövlət başçısı İlham Əliyevin Sərəncamı ilə tarixi Zəfərimizin əbədiləşdirilməsi məqsədilə işğaldan azad edilmiş ərazilər üzrə şəhər günləri təsis edilib. Bu sənədə əsasən 20 oktyabr Zəngilan Şəhəri Günüdür. Tarixə qısa nəzər salaq. Füzuli və Cəbrayıl rayonları işğal olunduqdan sonra zəngilanlılar 67 gün tam mühasirə şəraitində ermənilərlə vuruşdu. 25-29 oktyabr 1993-cü ildə Zəngilan rayonunun əhalisi son anadək vuruşaraq, 235 nəfər şəhid və itkin verərək Araz çayını keçmiş, İran İslam Respublikasının ərazisi ilə keçərək Azərbaycanın 43 rayonunda müvəqqəti məskunlaşdılar. 2020-ci il sentyabrın 27-də başlayan Vətən müharibəsi zamanı Zəngilan rayonundan şərqdə yerləşən Cəbrayıl rayonunda düşmən qüvvələrinə sarsıdıcı zərbə vurulması və 30-dan çox yaşayış məntəqəsinin işğaldan azad edilməsi, Azərbaycan Silahlı Qüvvələrinin Zəngilan rayonunun inzibati hüdudlarına çatmasına şərait yaratdı. Azərbaycan Silahlı Qüvvələri 2020-ci il oktyabrın 18-də Zəngilan rayonunun azad edilməsi uğrunda əməliyyata başlamışdır. Oktyabrın 20-də Azərbaycan Prezidenti İlham Əliyev xalqa növbəti müraciəti zamanı Zəngilan rayonunun Havalı, Zərnəli, Məmmədbəyli, Həkəri, Şərifan, Birinci Muğanlı və Zəngilan şəhərinin işğaldan azad edildiyini elan etdi. Zəngilan döyüşləri nəticəsində Azərbaycan Silahlı Qüvvələri tərəfindən Zəngilan şəhəri, rayonun 4 qəsəbəsi və 49 kəndi işğaldan azad edildi.  Azərbaycan-İran sərhədi Zəngilanın işğaldan azad olunması ilə tam bərpa olundu. İşğal altında qalmış 132 kilometr sərhəd bərpa edilib. Müharibədən dərhal sonra sərhəd boyunca bütün lazımi istehkam, mühafizə işləri görülməyə başladı.

Zəngilan azad olunmuş ərazilərin ilk bölgəsidir ki, artıq burada keçmiş məcburi köçkünlər evlərinə qayıdıb. Ağalı “ağıllı kəndi” sakinlərinə qovuşub. “Mən Ağalı kəndində dəfələrlə olmuşam - sakinlərin qayıdışından əvvəl və sonra. Mən onun şahidi oldum ki, oraya qayıdan insanlar öz köklərinə nə dərəcədə bağlıdırlar. Heç zaman öz vətənini görməyən gənc nəsil qayıdıb. Bu, onu nümayiş etdirir ki, Azərbaycan xalqı öz köklərinə necə dərindən bağlıdır. Bütün keçmiş məcburi köçkünlər səbirsizliklə gözləyirdilər ki, bizim torpaqlar azad edilsin və onlar qayıtmaq imkanına malik olsunlar” söyləyən dövlətimizin başçısı İlham Əliyev işğaldan azad edilmiş ərazilərdə, o cümlədən Zəngilanda rayonunda  görülən bərpa  işlərindən böyük qürur hissi ilə bəhs edir. Artıq bu torpaqlarımız tarixi sahibinə qovuşub. Bu gün Zəngilan beynəlxalq tədbirə ev sahibliyi edir. Zəngilanın müxtəlif istiqamətlərində fəal işlər gedir. Zəngilan  şəhərinin Baş planı artıq təsdiq edilib. İnfrastruktura böyük vəsait ayrılıb. Bir neçə yaşayış layihəsi icra edilməkdədir. 2025-ci ildə Zəngilan şəhərinin ilk sakinləri qayıdacaqlar.

44 günlük Vətən müharibəsinin hər günü tariximizə qələbə səhifəsi kimi yazıldı. Bu baxımdan bu mühüm məqamı da böyük qürur hissi ilə qeyd edirik ki, 25  oktyabr Qubadlı Şəhəri Günüdür. Hər bir tarixi gün keçilən yolun təhlilini bir tələb kimi qarşıya qoyur. Qarabağ münaqişəsi tarixə qovuşsa da, Ermənistanla münasibətlərdə yeni səhifənin açılması üçün  qarşı tərəfə sülh təklifi edilsə də mənfur düşmənin 30 ildə bu torpaqlarımızdakı vəhşiliklərini, çox da uzaq olmayan 44 günlük İkinci Qarabağ müharibəsinin gedişi dövründə törətdikləri  təxribatları, vandalizmi unutmamışıq. Biz bu müharibəni şəhidlərimizin canı-qanı bahasına, hərbçilərimizin rəşadəti hesabına, dövlətimizin siyasəti hesabına qazanmışıq.

Qubadlının azad edilməsi əməliyyatı bir neçə gün çəkdi. Şəhərdə ermənilər güclü istehkamlar qurmuşdular. Yüksəkliklərdə düşmənin hərbi birləşmələri yerləşmişdi. Qubadlını azad etmək üçün, ilk növbədə, yüksəkliklər götürülməli idi. Çünki düşmən bu yüksəkliklərdən müntəzəm olaraq hərbçilərimizə atəş açırdı. Ona görə Qubadlı əməliyyatı xüsusi peşəkarlıq və fədakarlıq tələb edirdi. Azərbaycan Ordusu bu peşəkarlığı, fədakarlığı göstərib. İlk növbədə, şəhərə hakim olan yüksəkliklər götürüldü, ətrafda yerləşən kəndlər, o cümlədən Xanlıq, Padar, Sarıyataq kəndləri götürüldü və strateji yüksəkliklər ələ keçirildi. Ondan sonra oktyabrın 25-də Azərbaycan Silahlı Qüvvələri şəhəri düşməndən təmizləyiblər.  Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək Qubadlı şəhəri və rayonun 41 kəndi azad olunub. 

Müzəffər Ali Baş Komandan  İlham Əliyevin Qubadlıya 2020-ci ilin sonunda etdiyi ilk  səfər Azərbaycan Bayrağının ucaldılması ilə yadda qaldı. Ötən dörd ildə dövlətimizin başçısının Qubadlı rayonuna reallaşdırdığı dörd səfərin hər biri mühüm sosial obyektlərin açılışı və təməlqoyma mərasimlərinin keçirilməsi ilə yadda qalıb.  

Şəhərin Baş planında işlərin sistemli şəkildə görülməsi öz əksini tapıb. Dövlət başçısı İlham Əliyev bu işlərə nəzarətin olunmasını qarşıya mühüm vəzifə kimi qoyub. Muzey komplekslərə gəldikdə isə onların  işğaldan azad edilmiş bütün ərzilərimizdə yaradılması nəzərdə tutulur. Muzey kompleksi Azərbaycan xalqının tarixi ədalətin və öz ərazi bütövlüyünün bərpası uğrunda göstərdiyi döyüş əzmini, misilsiz qəhrəmanlığını, o cümlədən 44 günlük Vətən müharibəsi zamanı qazandığı möhtəşəm Qələbəni indiki və gələcək nəsillərin yaddaşına həkk edərək əbədiləşdirən, haqq səsimizi dünyaya çatdıran təşviqat və informasiya mərkəzi olacaq.

Digər azad edilmiş torpaqlarda olduğu kimi,  Qubadlıda da quruculuq, bərpa işləri, müasir nəqliyyat, enerji və sair sosial-iqtisadi infrastruktur layihələri icra olunmaqdadır.  İndi  Zəngilandan Qubadlıya, Laçına dördzolaqlı yol çəkilir ki, bu yoldan insanlar rahat istifadə etsinlər. Eyni zamanda, burada istehsal olunacaq məhsulları bazarlara vaxtlı-vaxtında, itkisiz çatdırmaq üçün imkan olsun.  Qubadlı böyük potensiala malikdir. Zəngin təbiəti, təbii sərvətləri vardır. Həkəri, Bazarçay, Bəsitçay və Tərtər çayı vasitəsilə  su resurslarımızdan da səmərəli istifadə etmək imkanı qazandıq. Ən əsas məsələ  Qubadlı sakinlərinin də  bölgənin inkişaf konsepsiyasında yaxından iştirak etməsidir. Prezident İlham Əliyev rayona səfəri zamanı  ictimaiyyəti nümayəndələri ilə görüşür, onların görülən işlərlə bağlı fikirlərini öyrənir. Müzəffər Ali Baş Komandanın  görülən işlərlə yaxından tanış olmaq üçün mütəmadi bölgələrə səfəri ictimaiyyətdə böyük rəğbət hissi yaradır.

Samir Qocayev,
​YAP Goranboy rayon təşkilatının sədri