Bu sadə qulluq məsləhətlərinə əməl etməklə siz telefonunuzun ömrünü əhəmiyyətli dərəcədə uzada, onun gələcək illər üçün etibarlı və səmərəli qalmasını təmin edə bilərsiniz.

"Telefonunuza qayğı göstərdiyiniz və onu daim yenilədiyiniz halda ondan ən azı dörd və ya beş il yaxşı istifadə edəcəksiniz", - “Pixel Privacy” adlı texnoloji vebsaytdan Kris Hauk belə hesab edir. O, “Apple” və ya “Android” mobil cihazınızın ömrünü uzatmaq üçün bəzi məsləhətlər də verib:

Telefonunuzun ömründə ən böyük faktorlardan biri batareyadır. Yenidən doldurulan batareyanın kimyəvi yaşı onun istehsal edildiyi vaxtla əlaqəli deyil. “Apple”a görə, bu, temperatur tarixi və şarj nümunəsi kimi amillərin mürəkkəb qarışığına əsaslanır.

"Litium-ion batareyaları kimyəvi cəhətdən köhnəldikcə, onların saxlaya biləcəyi yükün miqdarı azalır, nəticədə batareyanın ömrü azalır və ən zəif performansla nəticələnir", - Hauk bildirib.

“Apple” şirkəti açıqlayıb ki, onun doldurma optimallaşdırma texnologiyası batareyanın ömrünü artırmaq üçün nəzərdə tutulub və iPhone istifadəçiləri üçün telefonlarını bir gecədə doldurmaq təhlükəsizdir.

“Samsung” isə deyir ki, litium-ion batareyaları 50%-dən yuxarı şarjda saxlandıqda daha yaxşı işləyir. “Samsung” şarjın tükənməsinin əleyhinədir.

"Batareyanın tam boşalmasına təkrar-təkrar icazə vermək telefonun ömrünü qısalda və ümumi tutumunu azalda bilər," -şirkət onlayn bələdçidə deyir. Bu baş verərsə, batareyanı daha tez-tez doldurmalı olacaqsınız və şarjın davamlılığı da azalacaq.

“Apple” deyir ki, batareyalar doldurulduqca isinir və bu, onların ömrünü qısalda bilər. Şirkət telefonları 95 Fahrenheit dərəcədən (35 dərəcə Selsi) yuxarı olan qızmar temperaturda istifadə etməmək və ya şarj etməmək barədə xəbərdarlıq edir ki, bu da "batareyanın ömrünü həmişəlik azalda bilər".

“Samsung” həmçinin bildirir ki, həddindən artıq isti və ya soyuq batareyalara zərər verə bilər. Şirkət insanlara xəbərdarlıq edir ki, məsələn, hava çox isti və ya soyuq olanda telefonlarını avtomobilin saxlama qutusuna qoymasınlar. Telefonunuzu dondurucuya da qoymayın; dondurucunun batareyanın ömrünü uzada biləcəyi bir mifdir. Bu, da yanlışdır və batareyanıza zərər verə bilər.

“Android” əməliyyat sistemi və “Pixel” telefonları istehsal edən “Google” da istiyə məruz qalmış batareyaların istifadə edilmədikdə belə daha tez boşaldığını və bunun batareyaya zərər verə biləcəyini söyləyir.

Tətbiqlərin və ya funksiyaların batareyanızın gündəlik ömrünü və doldurma dövrləri arasındakı vaxtı uzadaraq daha az enerji sərf etməsi üçün cihaz parametrlərinizi də düzəldin. Bunun üçün telefonunuzun ekran parlaqlığını azalda, qənaətli rejimi yandıra və ekranın söndürülməsinə sərf olunan vaxtı azalda bilərsiniz. Ətrafdakı işıq səviyyəsinə uyğun olaraq ekran parlaqlığını tənzimləyən avtomatik parlaqlıq funksiyasını aktiv edin. Həmçinin söndürə və ya silə biləcəyiniz enerjiyə ehtiyacı olan proqramların olub-olmadığını bilmək üçün parametrlərinizdə batareya istifadəsini yoxlayın.

Güc səviyyəsi 10%-dən aşağı düşərsə “iPhone” istifadəçiləri batareyanın doldurulmasına ehtiyac olmadan ömrünü uzatmaq üçün aşağı enerji rejimini yandıra bilərlər. “Samsung”un “Android” telefonlarında da oxşar "enerji qənaət rejimi" var. Siz həmçinin onu həmişə açıq qoya bilərsiniz. Lakin bu, telefonunuzun performansına təsir edə bilər.

“Samsung” deyir ki, istifadəçilər istifadə edilmədikdə Bluetooth və ya Wi-Fi-ı söndürə bilərlər. Baxmayaraq ki, “Apple” qoşulmadıqda minimum enerji sərf etdikləri üçün onları yandırmağı məsləhət görür.

Telefonları qorumaq üçün möhkəm qoruyucu örtük almalısınız.

Ekran qoruyucusu haqqında da unutmayın. Plastik versiyalar ən ucuz seçimdir, lakin cızıqlara və düşmələrə qarşı daha yaxşı qorunma təmin edən TPU film və ya temperli şüşə dözümlü olur.

Telefonunuzu cibinizdə və ya çantanızda saxladıqda onun portları və rozetkalarına tük və digər zibilləri toplana bilər. Bir diş çöpü ilə vaxtaşırı təmizləməyiniz kifayətdir. Sadəcə kiçik dəliklərin içərisinə itələmək əvəzinə zibilləri telefondan uzaqlaşdırdığınızdan əmin olun.

Proqram təminatı telefonun ömrünün digər mühüm amilidir. Mütəxəssislər əməliyyat sisteminizi və proqramlarınızı ən son məxfilik, təhlükəsizlik və batareyanın idarə edilməsi funksiyalarına malik olmaq üçün güncəl saxlamağı məsləhət görürlər.

Telefonunuz yaşlandıqca bunu etmək daha asan olacaq, çünki bəzi cihaz istehsalçıları yeniləmələri təmin etmək üçün vaxt limitini uzadıblar.

“Google”un “Pixel 8” və daha yeni telefonları istifadəçiləri yeddi illik “Android” və təhlükəsizlik yeniləmələri ilə təmin etməyi öhdəsinə götürüb. Köhnə modellərdə isə bu, dörd-beş il idi. “Samsung”, həmçinin bu ilin əvvəlində satışa çıxarılan S24 cihazından başlayaraq əməliyyat sistemi yeniləmələrini yeddi ilədək uzadıb.

“Apple” isə hələ də köhnə cihazlar üçün iOS yeniləmələrini nə qədər dəstəkləyəcəyini dəqiq açıqlamayıb.

Nubar Süleymanova, “İki sahil”