Əskər Abbasov – 65 il

12 fevral 2024-cü il tarixində Azərbaycan Respublikası Dövlət Neft Şirkətinin (SOCAR) Axtarış-kəşfiyyat işləri və yataqların qiymətləndirilməsi departamentinin Yataqların qiymətləndirilməsi və karbohidrogen ehtiyatlarının idarə olunması şöbəsinin rəisi, respublikanın “Əməkdar mühəndis”i, “Fəxri neftçi”, texnika elmləri namizədi Əskər Abbasovun 65 yaşı tamam olur.

Dostları, yoldaşları və həmkarları adından Əskər müəllimi təbrik edir, ona uzun ömür, möhkəm cansağlığı və fəaliyyətində müvəffəqiyyət arzu edirik.

Əskər müəllim 1959-cu ilin fevral ayının 12-də ziyalı ailəsində dünyaya göz açmışdır. O, 1976-cı ildə orta məktəbi bitirərək Azərbaycan Dövlət Universitetinin mexanika-riyaziyyat fakültəsinə daxil olmuş, 1981-ci ildə ali təhsilini uğurla başa vurmuşdur. Həmin il təyinatla Azərbaycan Milli Elmlər Akademiyasının Kibernetika İnstitutunda mühəndis vəzifəsində əmək fəaliyyətinə başlamışdır. 1986-cı ildə Azərbaycan Neft və Kimya İnstitutunun Neft yataqlarının işlənməsi və istismarı kafedrasının əyani aspiranturasına daxil olmuş, Azərbaycanda neft elminin inkişafında mühüm xidmətləri olan akademik Azad Mirzəcanzadənin rəhbərliyi ilə neft-mədən işləri sahəsində, neftin çıxarılmasında texnoloji proseslərin mexanikası, riyazi fizika metodlarının neft sahəsində tətbiqi ilə bağlı problemlərin araşdırması ilə məşğul olmuşdur. 1990-cı ildə dissertasiyanı müdafiə edərək, texnika elmləri namizədi kimi həmin ali məktəbdə “Neftçıxarmanın texnika və texnologiyası” laboratoriyasında kiçik elmi işçi, elmi işçi vəzifəsində çalışmış, gənc neftçilərin hazırlanması üçün elmi-pedaqoji fəaliyyət göstərmişdir.

1993-cü ildən əmək fəaliyyətini Azərbaycan Respublikasının Dövlət Neft Şirkətində davam etdirmiş, Azərbaycanın neft və qaz yataqlarının işlənməsi, ehtiyatların hesablanması və uçotu sahəsində müxtəlif vəzifələrdə çalışmışdır. 2002-ci ildə Əskər müəllim xarici şirkətlərlə SOCAR arasında “Kürsəngi” və “Qarabağlı” yataqlarının reabilitasiyası üzrə bağlanmış sazişə uyğun yaradılmış “Salyanoyl” əməliyyat şirkətinə layların işlənməsi üzrə mühəndis vəzifəsinə təyin edilmiş və 2008-ci ilədək bu şirkətdə çalışmışdır. 2008-ci ildə o,  bp şirkətinə keçərək mədən mühəndisi vəzifəsində çalışmağa başlamışdır.

2009-cu ildə yenidən SOCAR-ın Baş ofisinə qayıtmış,burada  Neft və qaz yataqlarının işlənməsi, sonradan Neft-qaz laylarının və ehtiyatlarının idarə edilməsi şöbəsinin rəisi vəzifəsində çalışmışdır. Hazırda Əskər müəllim SOCAR-ın Yataqların qiymətləndirilməsi və karbohidrogen ehtiyatlarının idarə olunması şöbəsinin rəisi vəzifəsində çalışır.

Əskər müəllim hansı təşkilatda, hansı kollektivdə çalışmasına baxmayaraq, öz biliyi, bacarığı və tapşırılan hər bir işə məsuliyyətlə yanaşması kimi keyfiyyətləri ilə seçilmiş və həmkarlarının dərin hörmətini qazanmışdır. O, ABŞ, Böyük Britaniya, Rusiya, Norveç, Yaponiya, Avstriya, Çin, Qazaxıstan, Türkmənistan və s. kimi neft-qaz ölkələrində dəfələrlə SOCAR-ı təmsil etmiş, yataqların işlənməsi sahəsindəki fəaliyyəti ilə yüksək nəticələr əldə etmişdir.

Azərbaycanda və dünyada yayılan bir çox jurnallarda və nəşrlərdə elmi məqalələri dərc edillmiş, bir çox elmi-metodik rəhbərliklərin və təlimatların müəllifi və həmmüəllifi olmuşdur.

2015-ci ildə Azərbaycan Respublikasının Prezidenti yanında Ali Attestasiya Komissiyası tərəfindən Əskər Abbasova dosent elmi adı verilmişdir. Əskər müəllim yataqların işlənməsi, ehtiyatların idarə edilməsi, quyularda kompleks geoloji-geofiziki tədqiqatların aparılması üzrə bir çox beynəlxalq kurslarda iştirak etmiş, sertifikat və diplomlar almışdır. O, SOCAR-ın yataqların işlənməsi və ehtiyatların hesablanması üzrə Mərkəzi ekspert və digər elmi və texniki sahələr üzrə komissiyalarının fəal üzvüdür.

Azərbaycanın neft sənayesində Əskər Abbasovun fəaliyyəti rəhbərlik tərəfindən yüksək qiymətləndirilmiş, SOCAR-ın Fəxri fərmanına, Azərbaycan Respublikası Prezidentinin Sərəncamı ilə “Əməkdar mühəndis” fəxri adına və SOCAR-ın “Fəxri neftçi” döş nişanına layiq görülmüşdür.

65 yaşının tamam olması münasibətilə dostları, yoldaşları və həmkarları adından Əskər müəllimi təbrik edir, ona möhkəm cansağlığı, uzun və mənalı ömür arzu edirik!

Dərin hörmətlə,

Həmkarları