Azərbaycan Respublikası Dövlət Neft Şirkəti (SOCAR) və “Bakı Gəmiqayırma Zavodu” MMC neftdaşıyan tankerin tikintisinə və alqı-satqısına dair gəmiqayırma müqaviləsi imzalayıb.

“İki sahil” bu barədə SOCAR-a maliyyə hesabatına istinadən xəbər verir.

Məlumata görə, gəmiqayırma müqaviləsinin ümumi dəyəri 28,8 milyon ABŞ dollarıdır.

Xatırladaq ki, SOCAR ölkə prezidentinin 13 sentyabr 1992-ci il tarixli fərmanı ilə yaradılıb. 100 % dövlətə məxsus şirkətin əsas fəaliyyəti neft, qaz və qaz kondensatlarının hasilatı, emalı və nəql edilməsi, eləcə də neftin, qazın və neft məhsullarının satışından ibarətdir.

“Bakı Gəmiqayırma Zavodu”nun təməli 2010-cu ildə qoyulub. 2011-ci il mayın 10-da “Bakı Gəmiqayırma Zavodu” MMC birgə müəssisəsi təsis edilib. 2013-cü ildə Prezidenti İlham Əliyevin iştirakı ilə rəsmi açılışı baş tutan zavoda 2015-ci ildə Qaradağ Sənaye Parkının rezidenti statusu verilib.