2023-cü il mayın 10-da Azərbaycanda Ümummilli Lider Heydər Əliyevin anadan olmasının 100 illiyi qeyd edilir. Siyasətçi ölkənin sənayesini və kənd təsərrüfatını müasirləşdirib, milli mədəniyyətin inkişafına yeni vüsət verib və dövlət üçün bir sıra taleyüklü qərarlar qəbul edib.

“İki sahil” xəbər verir ki, bu münasibətlə News.ru komandası Rusiya Federasiyası Prezidentinin mətbuat katibi Dmitri Peskov, keçmiş bakılı, rejissor Yuli Qusman və Ümummilli Liderin keçmiş sürücüsü Vladimir Tupitsın ilə həmsöhbət olub, həmçinin müasirlərinin Heydər Əliyev haqqında xatirələrini toplayıb.

"Prezident Putinin Heydər Əliyevlə çox yaxın münasibətləri var idi. O, həqiqətən də Əliyevə böyük hörmətlə yanaşırdı. Onlar arasında dəfələrlə görüşlər olub. Əslində, Rusiya və Azərbaycan arasında bu gün mövcud olan ikitərəfli münasibətlərin möhkəm təməli həmin illərdə qoyulub. Putin İlham Əliyev ilə də eyni münasibətdədir”, - deyə Rusiya Prezidentinin mətbuat katibi Dmitri Peskov bildirib.