SOCAR və onun törəmə müəssisələri 3 üç girov hesabına ümumilikdə 202 milyon manat yerləşdirib.

AZƏRTAC xəbər verir ki, bu barədə SOCAR-ın 2017-ci il üzrə konsolidasiya edilmiş maliyyə hesabatında deyilir. Bildirilir ki, 2017-ci il dekabrın 31-i tarixində məhdudlaşdırılmış pul vəsaitləri əsas etibarı ilə üç girov hesabından təşkil olunub. SOCAR və onun törəmə müəssisələri “Azərikimya” zavodunun modernizasiya prosesi ilə bağlı olan xarici alışlar üçün Azərbaycan Beynəlxalq Bankında girov kimi 129 milyon manat məbləğində məhdudlaşdırılmış pul vəsaiti yerləşdirib. Bundan əlavə, SOCAR və onun törəmə müəssisələri “SOCAR Turkey Enerji A.Ş.”nin (STEAŞ) 13 faiz səhmləri ilə əlaqədar Satış Opsionu Razılaşmasına uyğun olaraq “Goldman Sachs International”a ödəniləcək minimal ödəniş üçün zəmanət olaraq “Deutsche Bank”da 63 milyon manat (37 milyon ABŞ dolları) məbləğində məhdudlaşdırılmış pul vəsaiti yerləşdirib. Şirkət və onun törəmələrinin, həmçinin 10 milyon məbləğində akkreditiv üçün girov kimi saxlanılan hesabı mövcuddur.