Bosniya və Herseqovinanın paytaxtı Sarayevoda keçirilən Xüsusi Olimpiya Açıq Cüdo Turnirində Azərbaycan təmsilçiləri 4 medal qazanıblar.

Azərbaycan Cüdo Federasiyasının adaptiv cüdo qrupunun üzvlərindən Sadiq Nəzirov (G-2) gümüş, Adilə Niftaliyeva (G-24) və Yusif Nəsirli (G-7) isə bürünc medala sahib olublar. Bu yarış hər üç cüdoçunun ilk beynəlxalq turnir təcrübəsi olub.

Azərbaycan komandasının digər üzvü Kamran Quliyev (G-10) isə bütün rəqiblərini qabaqlayaraq qızıl medal qazanıb.

Beləliklə, Azərbaycan təmsilçiləri turniri 1 qızıl, 1 gümüş və 2 bürünc medalla başa vurublar.

Qeyd edək ki, adaptiv cüdo xüsusi qayğıya ehtiyacı olan şəxslərin fərdi imkanları nəzərə alınmaqla cüdo ilə məşğul olmasına və idman vasitəsilə sosial inteqrasiyasına imkan yaradır.