Almaniya kansleri Fridrix Merts Leypsiq aeroportunda pilotsuz uçuş aparatları ilə baş verən hadisəyə görə məsuliyyəti mümkün qədər tez Rusiyanın üzərinə qoymaq istəyib, lakin nazirlər onu bu fikirdən daşındırıblar.

“İki sahil” xəbər verir ki, bu barədə "Der Spiegel" jurnalı mənbələrə istinadla yazır.

Merts hələ avqustun 25-də bəyan etmişdi ki, Berlin tezliklə Almaniya hakimiyyətinin versiyasına görə Leypsiqdəki hadisədə cavabdeh olanların adlarını açıqlayacaq. Nəşrin məlumatına görə, Merts avqustda məzuniyyətdə olarkən təhqiqatın gedişatı haqqında hər gün məlumat alıb. Avqustun 25-26-da hökumət Noyhardenberq yaşayış məntəqəsində qapalı səfər iclası keçirib. İclas ölkə iqtisadiyyatının vəziyyəti məsələsinə həsr olunsa da, Merts Daxili İşlər Nazirliyinin rəhbəri Aleksander Dobrindt və xarici işlər naziri Yohann Vadeful ilə ayrı-ayrı görüş keçirib. Görüşdə kanslerin təhlükəsizlik üzrə müşaviri Günter Zautter də iştirak edib.

"Spiegel" qeyd edir ki, Merts mümkün qədər tez Rusiya ünvanına açıq ittihamlarla çıxış etmək istəyirdi, lakin iki iştirakçı "bir az vaxt xahiş edərək" onu bundan çəkindiriblər. Dobrindt bunu təhqiqat üçün yarana biləcək təhlükə ilə izah edib, Vadeful isə XİN-in "Moskvanın Almaniya sanksiyalarına cavab verəcəyi təqdirdə", o cümlədən diplomatlara qarşı tədbirlərə hazırlaşmalı olduğunu vurğulayıb.

Kansler nazirlərə əlavə vaxt verməyə razılaşıb və müşavir Zautterə nazirlərlə birgə bəyanatı razılaşdırmağı tapşırıb. Jurnalın yazdığına görə, Dobrindt və Vadeful həmin bəyanatı "bir həftə sonra ciddi görünüşlə oxuyublar".