Avqustun 24-də Türkiyənin Konya vilayətində yerləşən Səlcuq Universitetində Türk dünyası ölkələrindən və digər dövlətlərdən olan gənc tədqiqatçıları bir araya gətirən VIII Yay Məktəbi fəaliyyətə başlayıb.
“İki sahil” xəbər verir ki, bu məktəb Beynəlxalq Türk Akademiyası, Türkiyə Elmlər Akademiyası (TÜBA) və Səlcuq Universitetinin əməkdaşlığı, eləcə də Konya vilayətinin yerli hakimiyyət orqanlarının və şəhər bələdiyyələrinin dəstəyi ilə keçirilir.
Açılış mərasimində TÜBA-nın prezidenti Müzaffər Şəkər, Beynəlxalq Türk Akademiyasının vitse-prezidenti Bülent Bayram və Səlcuq Universitetinin prorektoru Zeki Bayramoğlu iştirak ediblər.
Tədbirdə çıxış edən Zeki Bayramoğlu bildirib: “Səlcuq Universiteti üçün belə mühüm beynəlxalq elmi toplantıya ev sahibliyi etmək böyük şərəf və qürurdur. Bu yay məktəbinin əhəmiyyəti ondan ibarətdir ki, müxtəlif ölkələrdən olan gənc tədqiqatçıları bir araya gətirir, bilik və təcrübə mübadiləsi üçün imkan yaradır. Əminik ki, burada formalaşan elmi əlaqələr gələcəkdə birgə tədqiqatlara və Türk dünyasında genişmiqyaslı elmi layihələrə çevrilə bilər”.
Qeyd edək ki, Beynəlxalq Türk Akademiyası yay məktəbinə mühazirəçi qismində uzun illər elmi əməkdaşlıq etdiyi Türk dünyası ölkələrindən tanınmış alim və mütəxəssisləri dəvət edib. Onlar bir həftə ərzində mühazirələr oxuyacaq, iştirakçılarla təcrübə və biliklərini bölüşəcəklər.
Bu il yay məktəbində Azərbaycan, Türkiyə, Qazaxıstan, Qırğızıstan, Özbəkistan, Albaniya, Bosniya və Herseqovina, Gürcüstan, Monqolustan, Rusiya, Şimali Makedoniya və Tatarıstan (Rusiya Federasiyası) olmaqla 13 ölkə və regiondan 30-dan çox gənc tədqiqatçı iştirak edir. Onlar bir həftə ərzində peşəkar biliklərin genişləndirilməsi və elmi əlaqələrin inkişafı istiqamətində mühazirələrdə, müzakirələrdə və digər akademik tədbirlərdə iştirak edəcəklər.
VIII Yay Məktəbinin proqramı Türk dünyasının tarixi və mədəni coğrafiyası, türk dili və ədəbiyyatı, sivilizasiya irsi, incəsənət və memarlıq tarixi, eləcə də ənənəvi sənət növləri ilə bağlı məsələləri əhatə edir.
Yay məktəbi müxtəlif ölkələrdən olan gənc tədqiqatçılarla aparıcı alimlər arasında peşəkar dialoq üçün platforma olacaq. İştirakçılar bir həftə ərzində seçdikləri elmi istiqamətlər üzrə biliklərini genişləndirməklə yanaşı, yeni akademik əlaqələrin, birgə tədqiqatların və Türk dünyasında elmi əməkdaşlıq çərçivəsində gələcək layihələrin əsasını qoymaq imkanı əldə edəcəklər.
