İtaliyada aparılan yeni araşdırma sosial mediadan istifadəyə erkən yaşda başlayan uşaqların bəzi fənlər üzrə akademik göstəricilərinin daha aşağı ola biləcəyini göstərib.
İtaliyanın Milano-Bicocca Universitetinin tədqiqatçıları 5 mindən çox italiyalı şagirdin sosial media vərdişləri ilə onların riyaziyyat, italyan dili və ingilis dili üzrə imtahan nəticələrini müqayisə ediblər. Araşdırmada 13 və 14 yaşlı şagirdlərin nəticələri təhlil olunub. Məlum olub ki, ilk sosial media hesabını 11-12 yaşlarında açan şagirdlər ən azı 14 yaşına qədər sosial mediadan istifadə etməyə başlamayanlarla müqayisədə bəzi fənlər üzrə daha aşağı nəticə göstəriblər.
Nəticələri “Nature Human Behaviour” jurnalında dərc olunan araşdırmada tədqiqatçılar xüsusilə riyaziyyat və italyan dili üzrə göstəricilərdə nəzərəçarpacaq fərq müəyyən ediblər. Bununla belə, sosial mediaya erkən yaşda başlamağın şagirdlərin ingilis dili nəticələrinə eyni təsiri göstərmədiyi aşkarlanıb. Alimlər bunun mümkün səbəblərindən biri kimi sosial media platformalarında ingilis dilində yazıların və dialoqların geniş yayılmasını göstərirlər. Bu mühit şagirdlərin xarici dildə əlavə oxu və ünsiyyət təcrübəsi qazanmalarına şərait yarada bilər.
Araşdırmanın müəlliflərindən olan Marko Gui sosial media istifadəsinin təsirlərinin mürəkkəb olduğunu bildirib. Onun sözlərinə görə, əldə olunan nəticələr ən azı yeniyetməlikdən əvvəlki dövrdə sosial media istifadəsinin müəyyən problemlərlə əlaqəli ola biləcəyini göstərir: “Burada diqqət çəkən məqam isə yalnız sosial media platformalarında keçirilən vaxt deyil, istifadəyə hansı yaşda başlanılmasıdır. Erkən yaşda sosial şəbəkələrə qoşulmaq uşağın diqqətinin, gündəlik vərdişlərinin və dərsə ayırdığı vaxtın dəyişməsinə səbəb ola bilər. Bununla yanaşı, bu tədqiqat sosial mediadan erkən istifadənin zəif akademik nəticələrin birbaşa səbəbi olduğunu sübut etmir. Ailə mühiti, sosial-iqtisadi vəziyyət, əvvəlki akademik göstəricilər və istifadə olunan platformalar kimi digər amillər də nəticələrə təsir göstərə bilər.”
Şahnigar Əhmədova, “İki sahil”
