Fransanın idman naziri Marina Ferrari 2030-cu il Qış Olimpiya və Paralimpiya Oyunlarının Təşkilat Komitəsində (Cojop) idarəetmə böhranının davam etdiyini etiraf edib.

“İki sahil” xəbər verir ki, bununla belə, o, hazırlıq prosesinin qrafik üzrə davam etdiyini və oyunların keçirilməsi ilə bağlı heç bir gecikmə riski olmadığını bildirib.

Nazirin sözlərinə görə, təşkilat komitəsinin idarəetmə modelinin yenilənməsi ilə bağlı tərəflər arasında hələ də yekun razılıq əldə olunmayıb. Bu böhran fevral ayında komitənin keçmiş baş direktoru Siril Linettin prezident Edqar Qrospironla aradan qaldırılması mümkün olmayan fikir ayrılıqları səbəbindən istefasından sonra daha da dərinləşib. İyun ayında isə komitənin baş direktoru vəzifəsinə keçmiş prefekt Vensan Roberti təyin olunub.

Yeni struktur çərçivəsində əməliyyatlar direktoru və icra bölməsinin direktoru vəzifələrinin yaradılması planlaşdırılsa da, təşkilati model üzrə konsensus əldə edilmədiyindən bu qərar payız aylarına təxirə salınıb.

Marina Ferrari vurğulayıb ki, əsas məqsəd minlərlə əməkdaşın çalışacağı böyük təşkilatın fəaliyyətini sabitləşdirmək və hazırlıq prosesini səmərəli şəkildə davam etdirməkdir.

Nazir həmçinin bildirib ki, 2030-cu il Qış Olimpiya Oyunlarının vaxtında keçirilməsi ilə bağlı narahatlıq yoxdur. O, Albertvil-1992 Oyunlarının irsini və 2023-cü ildə Savoyada keçirilən dağ xizəyi üzrə dünya çempionatı üçün yenilənmiş infrastrukturu bu baxımdan mühüm üstünlük kimi qiymətləndirib. Bununla yanaşı, Marina Ferrari qeyd edib ki, qarşıda Olimpiya kəndlərinin tikintisi kimi mühüm layihələr durur və bütün işlərin vaxtında başa çatdırılması üçün hazırlıqlar intensiv şəkildə davam etdirilir.

Bu açıqlamalar fonunda Fransada 2030-cu il Qış Olimpiya Oyunlarının təşkili və maliyyələşdirilməsi ilə bağlı siyasi müzakirələr də güclənib. Bir sıra siyasətçilər, o cümlədən Erik Siotti layihənin idarə olunmasını araşdırmaq üçün parlament istintaq komissiyasının yaradılmasını tələb edirlər. Hazırda tərəflər təşkilat komitəsində sabit idarəetmə modelinin formalaşdırılması istiqamətində danışıqları davam etdirir.