4 iyun 1975-ci ildə Los-Ancelesdə dünyaya gələn Ancelina Coli bu gün 51 yaşını qeyd edir. Hollivudun ən tanınmış və nüfuzlu simalarından biri hesab olunan aktrisa uzun illərdir həm kino sahəsindəki uğurları, həm də humanitar fəaliyyəti ilə diqqət mərkəzindədir.

“İki sahil” xəbər verir ki,  Ancelina Coli aktyorluq karyerasına hələ uşaq yaşlarında başlayıb. O, sonradan “Kəsilmiş Həyat” (Girl, Interrupted) filmindəki roluna görə “Oskar” mükafatına layiq görülərək dünya şöhrəti qazanıb.

Aktrisa xüsusilə “Lara Kroft: Qəbirüstü Talançı”, “Cənab və Xanım Smit”, “Solt” və “Malefisenta” kimi filmlərdə canlandırdığı obrazlarla Hollivudun əsas döyüş və macəra janrı ulduzlarından birinə çevrilib.

Kino karyerası ilə yanaşı, Coli sonrakı illərdə rejissorluq fəaliyyətinə də başlayıb və bir sıra filmlərə müəllif kimi imza atıb. O, həmçinin uzun müddət beynəlxalq humanitar missiyalarda iştirak edərək qaçqınların hüquqlarının müdafiəsi və müxtəlif sosial problemlərin həlli istiqamətində fəaliyyət göstərib.

Ancelina Colinin həyat və yaradıcılıq yolu parlaq rollar, nüfuzlu mükafatlar, qırmızı xalça tədbirləri və dünyanın müxtəlif bölgələrində həyata keçirdiyi humanitar missiyalarla zəngindir.

Onun 51 illik yubileyi münasibətilə dünya mediası aktrisanın ən yaddaqalan ekran obrazlarını, mükafatlarını və ictimai fəaliyyətini bir daha xatırlayır.