Bakıda bir sıra park və ictimai məkanlarda abadlaşdırma və yenidənqurma işlərinin aparılması planlaşdırılır
Bakı şəhərində park və ictimai məkanların abadlaşdırılması ilə bağlı planlaşdırılan genişmiqyaslı yenidənqurma layihələri paytaxtın inkişafı siyasətində yeni mərhələnin başlandığını göstərir. Bu təşəbbüs təkcə ayrı-ayrı yaşıllıq sahələrinin bərpası ilə məhdudlaşmır, eyni zamanda, şəhər mühitinin keyfiyyətinin yüksəldilməsi, ekoloji balansın qorunması və urban həyatın daha dayanıqlı model üzərində qurulması baxımından sistemli yanaşmanı əks etdirir. Son illərdə Bakı sürətlə böyüyən və yenilənən şəhərlər sırasında yer alır. Bu proses fonunda tikinti sektorunun genişlənməsi, yeni yaşayış massivlərinin salınması və infrastruktur layihələrinin həyata keçirilməsi ilə yanaşı, yaşıllıq sahələrinin qorunması və artırılması məsələsi də paralel şəkildə aktuallaşır.
Şəhər həyatında yaşıllığın strateji əhəmiyyəti
Məhz bu səbəbdən uzun müddət baxımsız qalmış park və bağların yenidən qurulması şəhər planlaşdırılmasının vacib istiqamətlərindən biri kimi meydana çıxır. Abadlıq işlərinin əsas diqqətçəkən istiqamətlərindən biri Nəbatat bağı ərazisində həyata keçiriləcək əsaslı təmir və bərpa layihəsidir. Bu məkan təkcə istirahət zonası deyil, eyni zamanda, elmi-tədqiqat və ekoloji baxımdan mühüm əhəmiyyət daşıyan bir mərkəzdir. Vaxtilə mühafizə zonası kimi tanınan bu ərazinin son illərdə müəyyən dərəcədə baxımsız qalması onun həm estetik görünüşünə, həm də funksional imkanlarına təsir göstərib. Planlaşdırılan yenidənqurma işləri çərçivəsində ərazinin əvvəlki görkəminin bərpası, mövcud bitki örtüyünün qorunması və zənginləşdirilməsi, piyada yollarının, istirahət zonalarının və digər infrastruktur elementlərinin yenilənməsi nəzərdə tutulur. Bu isə yalnız fiziki bərpa deyil, həm də şəhər sakinlərinin təbiətlə təmas imkanlarının genişləndirilməsi deməkdir.
Layihələndirmə və icra: Nələrə diqqət yetirilməlidir?
Digər mühüm məkanlardan biri isə Çəmbərəkənd parkı hesab olunur. Maraqlı məqam ondan ibarətdir ki, bu park nisbətən yeni salınmasına baxmayaraq artıq yenidən təmirə ehtiyac duyulan obyektlər sırasına daxil edilib. Bu isə şəhərsalma prosesində yalnız yeni layihələrin həyata keçirilməsinin kifayət etmədiyini, eyni zamanda, onların davamlı saxlanılması və keyfiyyətli istismarının təmin edilməsinin vacibliyini göstərir. Parkın yenidən qurulması zamanı əvvəlki mərhələdə yol verilmiş texniki və planlaşdırma çatışmazlıqlarının aradan qaldırılması, daha dayanıqlı materiallardan istifadə edilməsi və müasir şəhər dizaynı prinsiplərinin tətbiqi xüsusi əhəmiyyət kəsb edir.
Layihələrin həyata keçirilməsi üçün ilkin mərhələdə təxminən 3 milyon 26 min manat vəsaitin ayrılması planlaşdırılır. Bu məbləğin dörd park və on bağın abadlaşdırılmasına yönəldilməsi paytaxt üzrə genişmiqyaslı işlərin görüləcəyindən xəbər verir. Maliyyə resurslarının bu şəkildə bölüşdürülməsi bir tərəfdən müxtəlif ərazilərdə yaşayan vətəndaşların parklardan və digər yaşıllıq zonalarından bərabər şəkildə faydalanmasını təmin etməyə xidmət edir, digər tərəfdən isə şəhər üzrə balanslı inkişafın formalaşmasına şərait yaradır. Eyni zamanda, ayrılan vəsaitin səmərəli istifadəsi, layihələrin vaxtında və keyfiyyətli icrası, podratçıların məsuliyyəti və ictimai nəzarətin gücləndirilməsi kimi məsələlər də bu prosesin uğuru baxımından həlledici rol oynayır.
Birdəfəlik dəyişiklik, yoxsa uzunmüddətli strategiya?
Müasir şəhərsalma prosesində badlıq və yenidənqurma işlərinin ekoloji aspekti xüsusilə ön plana çıxır. Müasir şəhərlərdə yaşıllıq sahələri yalnız estetik funksiya daşımır, həm də ətraf mühitin qorunmasında mühüm rol oynayır. Ağac və bitkilər havadakı zərərli maddələrin azalmasına kömək edir, karbon qazının udulmasını təmin edir və şəhər iqliminin tənzimlənməsində iştirak edir. Bu baxımdan park və bağların bərpası Bakı şəhərində ekoloji vəziyyətin yaxşılaşdırılmasına birbaşa təsir göstərəcək. Xüsusilə yay aylarında müşahidə olunan yüksək temperaturun təsirinin azaldılması, kölgəlik sahələrin artırılması və mikroiqlimin yaxşılaşdırılması kimi nəticələr gözlənilir.
Sosial aspekt də bu layihələrin mühüm tərəflərindən biridir. Parklar və ictimai məkanlar insanların gündəlik həyatında mühüm rol oynayan sosial platformalardır. Burada müxtəlif yaş qruplarından olan insanlar istirahət edir, ünsiyyət qurur, idmanla məşğul olur və asudə vaxtını səmərəli keçirir. Bu məkanların müasir standartlara uyğun yenilənməsi cəmiyyətin sosial aktivliyinin artmasına, sağlam həyat tərzinin təşviqinə və ümumi rifahın yüksəlməsinə xidmət edir. Uşaqlar üçün oyun meydançalarının, yaşlılar üçün rahat istirahət guşələrinin, gənclər üçün idman və aktiv istirahət zonalarının yaradılması bu baxımdan xüsusi əhəmiyyət daşıyır.
Şəhər estetikası baxımından da bu layihələrin rolu danılmazdır. Müasir landşaft dizaynı, işıqlandırma sistemləri, su elementləri, dekorativ yaşıllıq kompozisiyaları və funksional zonalaşdırma parkların vizual cəlbediciliyini artırır. Bu isə yalnız yerli sakinlər üçün deyil, həm də turistlər üçün şəhərin daha cazibədar görünməsinə şərait yaradır. Bakı artıq beynəlxalq tədbirlərə ev sahibliyi edən və turist axınının artdığı şəhərlərdən biridir. Bu baxımdan ictimai məkanların yüksək səviyyədə olması şəhərin ümumi imicinə müsbət təsir göstərir.
Ümumilikdə, Bakı şəhərində park və ictimai məkanların abadlaşdırılması istiqamətində planlaşdırılan bu genişmiqyaslı təşəbbüs paytaxtın gələcək inkişaf modelinin mühüm komponentlərindən biri kimi qiymətləndirilir. Bu proses yalnız infrastrukturun yenilənməsi deyil, eyni zamanda, şəhər həyatının keyfiyyətinin yüksəldilməsi, ekoloji tarazlığın qorunması və sosial rifahın təmin olunması baxımından kompleks və strateji yanaşmanı əks etdirir. Əminliklə qeyd etmək olar ki, layihələrin uğurlu icrası nəticəsində Bakı daha yaşıl, daha komfortlu və daha müasir şəhər kimi formalaşacaq, sakinlər üçün daha əlverişli və sağlam həyat mühiti yaradılacaq.
Nigar Orucova, "İki sahil"
