Çinin Unitree Robotics şirkətinin rəhbəri Van Sinsin humanoid robotların hazırkı inkişaf səviyyəsini 10 yaşlı uşaqla müqayisə edib.

“İki sahil” xəbər verir ki, bu barədə məlumatı TASS yayıb.

Onun sözlərinə görə, hər il davamlı texnoloji irəliləyişlər baş versə də, robotların genişmiqyaslı tətbiqi üçün hələ vaxt lazımdır. “Bu proses ən azı üç-beş il, lakin on ildən çox olmayacaq müddət tələb edəcək”, — deyə o, bildirib.

2016-cı ildə əsası qoyulan və Xançjou şəhərində yerləşən Unitree Robotics humanoid modellərlə yanaşı, robot itlərin istehsalı ilə də məşğuldur. Şirkət 2025-ci ildə keçirilən Yeni il qala-konsertində 16 humanoid robotun ənənəvi “yanqe” xalq rəqsini dəsmal ilə ifa etməsi ilə diqqət çəkmişdi.

Ekspertlər hesab edirlər ki, süni intellekt və mexatronika sahəsindəki inkişaf humanoid robotların gündəlik həyata inteqrasiyasını sürətləndirsə də, onların tam funksional və müstəqil şəkildə fəaliyyət göstərməsi üçün əlavə texnoloji və etik çətinliklər hələ də qalmaqdadır.