Yanvarın 11-dən 15-dək Birləşmiş Ərəb Əmirliklərində “Gələcəyə doğru inteqrasiyalı başlanğıc” şüarı ilə “Əbu-Dabi Dayanıqlılıq Həftəsi” keçiriləcək.

“İki sahil” xəbər verir ki, həftə çərçivəsində bir sıra beynəlxalq tədbirlərin keçiriləcəyi planlaşdırılır.

Yanvarın 11-dən 12-dək Beynəlxalq Bərpaolunan Enerji Agentliyinin (IRENA) 16-cı Assambleyası və yanvarın 12-də Qlobal İqlim Maliyyəsi üzrə İllik Toplantı keçiriləcək. Beynəlxalq Təşkilata üzv dövlətlərin yüksək səviyyəli rəsmi nümayəndələri bu tədbirdə iştirak edəcəklər.

Yanvarın 13-də Əbu-Dabi Dayanıqlılıq Həftəsinin rəsmi açılış mərasimi keçiriləcək. Bu çərçivədə Zayed Dayanıqlılıq Mükafatının və Əbu-Dabi Dayanıqlılıq üzrə Rəqəmsal Sənət Müsabiqəsi iştirakçılarının mükafatlandırma mərasimi baş tutacaq.

Yanvarın 13-14-də keçiriləcək Əbu-Dabi Dayanıqlılıq Sammiti həftənin əsas tədbirlərindəndir. Sammitdə 30 panel iclası çərçivəsində 100-dən çox çıxış olacaq. Qlobal enerji sistemlərində keyfiyyətcə yenilik yaratmaq yolları, su və ərzaq təhlükəsizliyinin təmin edilməsi, təbiətin qorunması, süni zəkanın və digər startap texnologiyalarının təsiri əsas müzakirə mövzularıdır. Burada iştirakçılar qlobal davamlılıq gündəmini irəlilətmək üçün dinamik və inklüziv müzakirələrin şahidi olacaqlar. Əməkdaşlıqlar qurmaq, yeniliyi təşviq etmək və tətbiq oluna bilən həllər təqdim etmək məqsədilə təşkil olunan bu tədbir, biznes, hökumət və vətəndaş cəmiyyətindən olan tanınmış liderləri bir araya gətirəcək.

Yanvarın 13-dən 15-dək 18-ci Dünya Gələcək Enerji Sammiti keçiriləcək. Tədbir çərçivəsində 700-dən çox qlobal brend, dinamik “Greenhouse” startap zonası, “Fuse AI” təmiz texnologiya pavilyonu və “Greenpeace Cinema”nın debütü təqdim edəcək. Üç gün ərzində iştirakçılar 300-dən çox sənaye mütəxəssisi tərəfindən keçirilən konfranslarda iştirak etmək, qabaqcıl məhsul və həlləri nümayiş etdirən doqquz sərgi salonu ilə tanış olmaq imkanı əldə edəcəklər.

Qeyd edək ki, ötən ilki Dayanıqlılıq Həftəsində 13 dövlət başçısı, o cümlədən yüksək səviyyəli hökumət rəsmiləri, ümumilikdə 170 ölkədən 50 mindən çox insan iştirak edib.