Qazaxıstan son illərdə Mərkəzi Asiyanın ən dinamik inkişaf edən dövlətlərindən birinə çevrilmişdir. Prezident Qasım-Comərt Tokayevin rəhbərliyi altında həyata keçirilən sosial-iqtisadi islahatlar, idarəetmədə şəffaflığın artırılması, innovasiya və rəqəmsallaşma sahəsində görülən işlər ölkənin ümumi inkişaf tempini əhəmiyyətli dərəcədə sürətləndirmişdir. Bu proses təkcə iqtisadi göstəricilərdə deyil, həm də Qazaxıstanın beynəlxalq nüfuzunda və regional sabitlikdə öz əksini tapmaqdadır. 
Azərbaycan Respublikasının Prezidenti İlham Əliyevin 2025-ci il oktyabrın 21-də Astanaya etdiyi səfər iki ölkə arasında mövcud dostluq və strateji əməkdaşlıq əlaqələrinin daha da möhkəmlənməsinə xidmət etmişdir. Bu səfər Qazaxıstanın inkişaf istiqamətlərinə dəstək olmaqla yanaşı, regional əməkdaşlığın yeni mərhələsini formalaşdırmışdır. İlham Əliyevin səfəri çərçivəsində imzalanan sənədlər və keçirilən danışıqlar göstərdi ki, Azərbaycan və Qazaxıstan təkcə enerji və nəqliyyat sahələrində deyil, həm də texnologiya, təhsil və mədəniyyət istiqamətlərində qarşılıqlı tərəfdaşlığı dərinləşdirməyə sadiqdirlər.

Qazaxıstanın iqtisadi yüksəlişi sistemli və məqsədyönlü siyasətin nəticəsidir. Ölkədə sənaye istehsalının şaxələndirilməsi, enerji resurslarından səmərəli istifadə, ixrac potensialının artırılması və investisiya mühitinin yaxşılaşdırılması istiqamətində ardıcıl tədbirlər həyata keçirilir. Bu baxımdan, Azərbaycanın iqtisadi inkişaf modeli və regional logistik imkanları Qazaxıstan üçün mühüm əməkdaşlıq nümunəsi rolunu oynayır. Prezident İlham Əliyev çıxışlarında dəfələrlə qeyd etmişdir ki, Azərbaycan və Qazaxıstan bir-birini tamamlayan iqtisadi sistemlərə malikdir və birgə fəaliyyət bütövlükdə türkdilli məkanın beynəlxalq rəqabət qabiliyyətini artıracaqdır.

Siyasi baxımdan Qazaxıstan regionda sabitlik və dialoq mədəniyyətinin təşviqində mühüm rol oynayır. Ölkə həm Mərkəzi Asiyada, həm də Türk Dövlətləri Təşkilatı məkanında inteqrasiya proseslərinin fəal iştirakçısına çevrilmişdir. Tokayevin praqmatik və uzaqgörən siyasəti nəticəsində Qazaxıstan regional liderliyini daha da möhkəmləndirir. Bu kontekstdə İlham Əliyevin səfəri iki ölkənin bu istiqamətdə birgə fəaliyyətini dərinləşdirən mühüm siyasi hadisə olmuşdur. Astana görüşü təkcə ikitərəfli əməkdaşlıq baxımından deyil, həm də Cənubi Qafqaz–Mərkəzi Asiya strateji xəttinin yeni reallıqları kontekstində xüsusi əhəmiyyət kəsb edir.

Qazaxıstanın beynəlxalq arenadakı nüfuzu da artmaqdadır. Ölkə BMT, ATƏT, İslam Əməkdaşlıq Təşkilatı və Türk Dövlətləri Təşkilatı kimi qurumlarda fəal iştirak edir, sülh və əməkdaşlıq təşəbbüslərinin irəliləməsinə mühüm töhfə verir. Azərbaycanın bu istiqamətdəki siyasəti ilə Qazaxıstanın mövqeləri üst-üstə düşür və bu, iki dövlət arasında diplomatik koordinasiyanın yüksək səviyyədə olduğunu göstərir. İlham Əliyevin Astanaya səfəri məhz bu koordinasiyanın yeni mərhələyə keçməsini təsdiqləmişdir.

Mədəni-humanitar əlaqələr də Qazaxıstanın inkişaf prosesinin vacib istiqamətlərindəndir. Təhsil, elm və gənclər siyasəti sahəsində həyata keçirilən islahatlar ölkənin gələcək intellektual potensialını gücləndirir. Azərbaycan bu sahədə təcrübə mübadiləsi aparmaqla Qazaxıstanın elmi-texnoloji tərəqqisinə dəstək verir. Eyni zamanda, hər iki dövlət türk dünyasının ortaq mədəni irsinin qorunması və təbliği istiqamətində mühüm təşəbbüslərlə çıxış edir. Nəticə etibarilə, Qazaxıstanın inkişafı və güclənməsi təkcə daxili siyasətin uğuru deyil, həm də regional əməkdaşlığın nümunəsidir.
Prezident İlham Əliyevin səfəri bu inkişaf prosesinə yeni strateji məzmun qazandırmış, Azərbaycan–Qazaxıstan münasibətlərini yüksələn xətlə gələcəyə daşıyan mühüm siyasi hadisə kimi tarixə düşmüşdür. Hər iki dövlətin qarşılıqlı etimadı və strateji məqsədləri regionda sabitlik, rifah və inteqrasiyanın möhkəmlənməsinə xidmət edir.

Fidan Əliyeva,
YAP Xətai rayon təşkilatının əməkdaşı