Pakistan və Ermənistan iki ölkə arasında diplomatik əlaqələrin qurulmasına dair Birgə Bəyannamə imzalayıb.

“İki sahil” xəbər verir ki, bu barədə Pakistan Xarici İşlər Nazirliyi məlumat yayıb.

Qeyd edilib ki, müqaviləni Pakistan İslam Respublikasının baş nazirinin müavini və xarici işlər naziri senator Məhəmməd İshaq Dar ilə Ermənistanın xarici işlər naziri Ararat Mirzoyan bu gün imzalayıb.

Tərəflər Birləşmiş Millətlər Təşkilatının Nizamnaməsinin prinsip və məqsədlərinə sadiq olduqlarını bir daha təsdiqləyib, iqtisadiyyat, təhsil, mədəniyyət və turizm kimi sahələrdə əməkdaşlıq imkanlarını müzakirə ediblər.

Tərəflər sülh, tərəqqi və hər iki ölkənin xalqları üçün firavanlıq kimi ümumi məqsədlərə nail olmaq üçün ikitərəfli və çoxtərəfli forumlarda sıx əməkdaşlıq etmək istəklərini bir daha vurğulayıblar.

Məhərrəm Ağalaroğlu, “İki sahil”