Avropa İttifaqı (Aİ) xarici siyasət qərarlarında yekdillik qaydası əvəzinə səs çoxluğu prosedurunun tətbiqini nəzərdən keçirir.

“İki sahil” xəbər verir ki, bu barədə “Bloomberg” məlumat yayıb.

Qeyd edilib ki, bu, Macarıstanın Ukrayna ilə bağlı bütün qərarlara veto qoyması məsələsini həll etmək məqsədi daşıyır.

Nəşr Aİ-yə üzv dövlətlər arasında yayılan və jurnalistlər tərəfindən nəzərdən keçirilən sənədə əsaslanır.

Sənəd İttifaqın xarici siyasət qərarlarının qəbulu prosedurunun “yekdilliklə” hissəsini “səs çoxluğu” ilə dəyişdirilməsi imkanlarını əks etdirir. Belə bir dəyişiklik Avropa İttifaqına müəyyən məsələlərdə tez və qətiyyətli hərəkət etməyə imkan verəcək. Bu, bəzi ölkələri mühüm qərarlara veto qoymaq hüququndan da məhrum edəcək.

Macarıstanın hərəkətləri ilə bağlı Aİ ölkələri arasında narazılıq artır. Budapeşt Aİ-nin Rusiyanın Ukraynaya hücumlarını pisləyən birgə bəyanatı imzalamaqdan imtina edib. Bundan əlavə, Macarıstan Rusiyanın dondurulmuş aktivlərindən faizlərin Ukraynaya ötürülməsini nəzərdə tutan qətnamə layihəsini əngəlləməyə çalışır.

Məhərrəm Ağalaroğlu, “İki sahil”